Qyzmeti sapaly páter ıeleri kooperatıvterin eshkim japqaly jatqan joq - Qazybek Shaıh

NUR-SULTAN. QazAqparat – Páter ıeleri kooperatıvteriniń ornyna múlik ıeleri birlestigin qurý arqyly kommýnaldyq shyǵyndardy azaıtýǵa bolady. Bul týraly QR «Ulttyq kooperatıvter jáne ekonomıkalyq qoǵamdastyqtarynyń basqa da nysandary qaýymdastyǵy» zańdy tulǵalar birlestiginiń prezıdenti Qazybek Shaıh aıtty, dep habarlaıdy QazAqparat.

«Turǵyn úı-kommýnaldyq sharýashylyǵyndaǵy reforma Qazaqstan azamattary úshin bárin basynan bastap, ómirin jaqsartýdyń múmkindigi ekenin túsinseńizder eken. Úı keńesteriniń quzyry kúsheıtiledi. Páter ıeleri kooperatıvteri men turǵyndar arasyndaǵy baılanys qalypqa keledi. PIK-ter durys jumys istep turǵan jerde eshkim eshkimdi ornynan qozǵaıyn dep jatqan joq. Turǵyndar úshin bárin basynan bastaýdyń múmkindigi bolsa, PIK tóraǵalary úshin bul olardyń óz uıymdaryn servıstik basqarý qyzmetine aýystyrýdyń tetigi bola alady. Óıtkeni PIK tóraǵalary osy saladaǵy tájirıbeli basqarýshylar ekenin eshkim joqqa shyǵarmaıdy. Mundaı bilikti adamdardy joǵaltýǵa bolmaıdy. PIK jumysy sapaly ujymdarda turǵyndar da oǵan múddeli emes», - dedi Qazybek Shaıh ortalyq kommýnıkatsııalar qyzmetinde ótken brıfıngide.

Sondaı-aq, ol eski modelde jabysyp qalý da durys emes ekenin eskertti.

«Bárin basynan bastaǵandyqtan, múlik ıeleri birlestikteri baǵdarlamalardy iske asyra alady. Bizdiń Ulttyq kooperatıvter jáne ekonomıkalyq qoǵamdastyqtarynyń basqa da nysandary qaýymdastyǵy múlik ıeleri birlestikteriniń múshelerin uıym qyzmetine jańa baǵdarlamalar engizý arqyly kommýnaldyq tólem qunyn qalaı tómendetýge bolatynyn úıretedi. Turǵyndar kooperatsııasyn uıymdastyrýdaǵy negizgi maqsattyń biri - osy», - dedi qaýymdastyq tóraǵasy.