Qyzǵaldaqtar Túrkistan topyraǵyn túrli-tústi «tekemetke» aınaldyrdy

TÚRKІSTAN. QazAqparat - Qyzǵaldaqtar Túrkistan topyraǵyn túrli tústi «tekemetke» aınaldyrdy, dep habarlaıdy QazAqparat tilshisi.

Túrkistan oblysynyń keı aımaqtarynda ósken qyzǵaldaqtardan jerler qyzyl kilemdeı keıipke enip jatyr. Ásirese, «Batys Eýropa - Batys Qytaı» kólik dáliziniń Ordasbasy aýdanyna qarasty bóliginde jaıqalyp ósken qyzǵaldaqtar kóz qyzyqtyrady. Al, aldaǵy birer aptada Túlkibas aýdanyna qarasty Shubaıqyzyl shoqysynda da qyzǵaldaqtar gúldep, aýmaqqa ásem kórinis syılaıdy.

«Qazaqstanda kezdesetin 38 túrli qyzǵaldaqtyń 18-i qyzyl kitapqa engen. Sonyń ishindegi greıg, kaýfman qyzǵaldaqtary Túlkibas, Ordabasy, Báıdibek aýdandarynyń aýmaǵynda kezdesip jatyr. Munan bólek, jaqyn arada jabaıy qyzǵaldaqtarda ósip shyǵady. Jalpy, óńirde qyzǵaldaq alqaby jyldan jylǵa kóbeıip keledi» - deıdi Túrkistan olysy orman sharýashylyǵy jáne janýarlar dúnıesi aýmaqtyq ınspektsııasynyń bólim basshysy Nurdáýlet Orazymbetov.

Búginde tártip saqshylary men orman sharýashylyǵynyń mamandary birlesip, alqaptarda ósip turǵan qyzǵaldaqtardy qorǵaý jumystaryn atqarýda. Ásirese, qyzyqtaýǵa kelgen azamattarǵa qyzǵaldaqty julýǵa bolmaıtyndyǵyn túsindirip jatyr.

Aıta keteıik, budan aldyn qyzǵaldaq julǵandardyń áreketi áleýmettik jelide taraǵan bolatyn. Ázirge, Túrkistan polıtsııasy olardyń jeke basyn anyqtap jatyr.