Qyzdar ýnıversıtetiniń 70 jyldyq mereıtoı alaýy jaǵyldy

ASTANA. 12 qarasha. QazAqparat - Keshe Qazaq memlekettik qyzdar pedagogıkalyq ýnıversıtetiniń 1 kýrs stýdentterin «Ótkenniń ónegesi - búginginiń baǵa jetpes baılyǵy» atty stýdentter qataryna qabyldaý rásimine arnalǵan saltanatty jıynda qasıetti qara shańyraqtyń 70 jyldyq mereıtoıynyń alaýy resmı túrde jaǵyldy. Abaı atyndaǵy Qazaq memlekettik akademııalyq opera jáne balet teatrynda ótken mereıtoılyq sharaǵa belgili aqyn-jazýshylar, ǵalymdar, JOO basshylary men ýnıversıtettiń ardager ustazdary qatysty.

Saltanatty shara ýnıversıtet alaýyn alyp júgirgen estafetalyq marafonnyń qyzyqty sátteri beınelengen fılm arqyly bastaldy. Esterińizge sala keteıik, bul mereıtoı alaýy 23 qazan kúni oqý ordasynyń ardager ustazdary, prorektorlary, sondaı-aq, Ermahan Ybyraıym, Maııa Maneza sekildi Olımpıada chempıondarynyń qolynan ótip, Qyzdar ýnıversıteti qalashyǵyn tolyq sharlap, bas oqý ǵımaratyna jetkizilgen bolatyn. Alaý osy kúnge deıin sol jerde saqtalyp keldi. Estafetalyq marafon arqyly jaǵylǵan mereıtoılyq alaý - Qyzdar ýnıversıteti 70 jyldyq mereıtoıynyń tusaýkeseri bolyp sanalady.

Fılmnen keıin sahnaǵa kóterilgen Qyzdar ýnıversıtetiniń rektory Dınar Nóketaeva bas ǵımaratta saqtalǵan alaýdy birinshi prorektor Bahodır Alıevten saltanatty túrde alyp, el aldynda alaý oshaǵyn tutatty. Qyzdardyń tabıǵatynan habar beretin tutanǵan ádemi gúl tektes mereıtoılyq alaý lapyldap janǵan kezde aınalasyna erekshe shýaq shashyp, stýdentterdiń boıyna erekshe jalynmen áser etti. Olımpıadalyq oıyndarda ǵana bolatyn bul kórinis - 70 jyldyq tarıhy bar Qyzdar ýnıversıtetiniń Qazaqstan bilim-ǵylym salasyndaǵy ózindik altyn dińgek ekenin aıǵaqtap bergendeı.

Odan keıin sóz alǵan oqý ornynyń basshysy Dınar Nóketaeva: «Qyzdar ýnıversıteti - qarakóz qyzdarǵa bilim men dástúrli tárbıeni qatar berip otyrǵan parasat mektebi. Osy merzim ishinde kıeli oqý orny 50 myńnan astam mamandar daıyndap, mektep muǵaliminen bastap qoǵam qaıratkerine deıin tanymal óz túlekterin tárbıelep shyǵardy. Bul bilim uıasynan ushqan árbir túlek qoǵamda óz ornyn taba biletin bilikti de kásibı maman dep zor senimmen aıta alamyn», - dep sapqa jańa qosylǵan shákirtterdi «Men - Qyzdar ýnıversıtetiniń stýdentimin!» degen atqa laıyq bolýǵa shaqyrdy.

Qııaldaryn qanattaryna baılap, armandaryn arqalap kelgen birinshi kýrs stýdentterine ıgi tilegin bildirgen oqý ornynyń basshysy odan ári saltanatty túrde bilim kiltin І -kýrs stýdenti Aqsáýle Amantaevaǵa tabys etti. Al, stýdenttik bılet Dosbol Aıdaǵa tabystalsa, synaq kitapshasy Kóken Lázzatqa tapsyryldy.

Kesh barysynda sonymen qatar, 1 kýrs stýdentteriniń ant qabyldaý rásimi bolyp ótti.

Saltanatty jıyn sońy kontserttik baǵdarlamaǵa ulasyp, elimizge áıgili «Aıgúl», «Ular» ansamblderi, «Tomırıs» bı ansambli, 85 ánshiden quralǵan ýnıversıtettiń hor ujymy, 50 ónerpazdan turatyn ult-aspaptar orkestri jáne qazaq estradasynyń juldyzdary óner kórsetti, dep habarlady Qyzdar ýnıversıtetiniń baspasóz qyzmetinen.