Qyzdar ýnıversıtetinde «Rýhanı jańǵyrý» aıasynda jańa pánder engizildi

ASTANA. QazAqparat - Qazaq memlekettik qyzdar pedagogıkalyq ýnıversıtetinde «Rýhanı jańǵyrý» baǵdarlamasynyń negizgi baǵyttaryn bilim jáne ǵylym úrdisine engizý maqsatynda 6 elektıvti pán engizildi. Bul týraly oqý ornynyń resmı ókili Jandar Asan aıtty, dep habarlaıdy. QazAqparat tilshisi.

Atap aıtqanda, barlyq mamandyqqa «Uly Dala tarıhy» keshendi páni, geografııa mamandyǵyna - «Ólketaný», «Shoqan Ýálıhanovtyń geografııalyq zertteýleri», týrızm mamandyǵyna - «Týrıstik eltaný», «Qazaqstannyń týrıstik ortalyqtarynyń geografııasy», fılologııa, qazaq tili men ádebıeti, qazaq tilinde oqytpaıtyn mektepterdegi qazaq tili men ádebıeti mamandyqtaryna - «Latyn grafıkasy jáne qazaq jazýy», orys tilinde oqytpaıtyn mektepterdegi orys tili men ádebıeti» mamandyǵyna - «Iskýsstvo ı lıteratýra» pánderi engizildi.

«Rýhanı jańǵyrý» baǵdarlamasyn júzege asyrýdyń basty tetikteriniń biri - oqý úderisi ekeni belgili. Osyǵan oraı, atalǵan bastamany qolǵa aldyq. Memleket basshysynyń «Bolashaqqa baǵdar: rýhanı jańǵyrý» atty baǵdarlamalyq maqalasynda kórsetilgen mindetterdi júzege asyrý maqsatynda elimizdegi joǵary oqý oryndary da laıyqty qyzmet atqarýda. «Rýhanı jańǵyrý» baǵdarlamasynyń alty baǵyty boıynsha Qyzdar Ýnıversıtetiniń qurylymdyq bólimsheleri men atqarýshy organdardyń qyzmetin úılestiretin Jobalyq keńse ashyldy. Ýnıversıtet fakýltetteri óz qyzmetterin jobalyq negizde uıymdastyrady», - dedi Jandar Asan.