Qyzdar ýnıversıtetinde Abaıtaný kýrsy engizildi
Buǵan deıin Qyzdar ýnıversıtetiniń Qazaq fılologııasy jáne álem tilderi fakýltetiniń stýdentterine Zákı Ahmetov, Tursynbek Kákishov, Mekemtas Myrzahmetuly syndy ǵalymdar abaıtaný kýrsyn júrgizgen bolatyn. Al byltyrǵy oqý jylynan bastap ol barlyq fakýltetterde oqytyla bastady.
Bolashaq pedagogtar kýrs barysynda abaıtaný máseleleriniń damý baǵyttarymen, onyń aqyndyq mektebimen jáne hakimniń «Tolyq adam» fılosofııasymen tanysady.
Osy oraıda Qyzdar ýnıversıtetiniń professory, fılologııa ǵylymdarynyń doktory Rýda Zaıkenovanyń «Abaıtaný» atty oqýlyǵy da jaryq kórdi.
Kitapta aqynnyń shyǵys, batys jáne orys ádebıetterimen baılanysy, ǵulama oıshyldyń ǵylym, bilim, óner, el bıleý, tarıh, mahabbat, dinı tanym taqyrybynda jáne synshyldyq kózqarasta jazylǵan fılosofııalyq qarasózderiniń, óleńderiniń, poemalarynyń, aýdarmalarynyń mán-maǵynasy men mańyzy keńinen túsindirilgen.
«Shynaıy talant – ilýde bireýdiń ǵana mańdaıyna jazylatyn táńirdiń syıy. Osy turǵydan alyp qaraǵanda, XIX ǵasyrdyń ekinshi jartysynda kıiz týyrlyqty shańyraq astynan qarap-aq, álemdik deńgeıde sheberlik naqysh týǵyzyp, óreli oı aıtqan qazaq halqynyń uly aqyny, hakim Abaı danalyǵyna jańa zaman bıiginen qarap, kóńil aýdarýdyń mańyzy zor. Abaı – ǵalamdyq tulǵa. Abaıtanýdyń bastaý XX ǵasyrdyń bas kezindegi Alash arystary men sol tusta ómir súrgen oqymystylardyń tanym-biliginen bastalady. Qunanbaıulynyń danalyǵyn jete meńgerý arqyly búkilálemdik gýmanıstik jáne ulttyq ólshemderdiń adam tulǵasyn qalyptastyrýdaǵy ornyn baǵamdap, ómirdi jáne adamzat qupııasyn tanýǵa bolady», – deıdi oqýlyq avtory, professor Rýda Zaıkenova.