Kyzdar.Net saıtynda onlaın jeńgeteılyqpen aınalysqan top kúnine 2 mln teńge tabys tapqan

ASTANA. QazAqparat – Іshki ister mınıstrligi respýblıka aýmaǵynda onlaın jeńgetaılyqpen aınalysqan qylmystyq toptyń jolyn kesti. Olar kúnine 2 mln teńgege deıin tabys tapqan, dep habarlaıdy QazAqparat Polisia.kz saıtyna silteme jasap.

Qylmystyq top «Kyzdar.Net» ınternet-saıty arqyly jezókshelikpen aınalysatyn adamdardyń jarnamasyn jasap, onlaın jeńgetaılyqpen aınalysqan jáne kún saıyn 2 mln teńgege deıin paıda túsirip otyrǵan. Jalpy aqsha aınalymy 8 mlrd teńge bolǵan, orta eseppen jylyna 2 mlrd teńgeden asady. Saıtqa jynystyq sıpattaǵy 6 myńǵa jýyq habarlandyrý salynǵan.

Saýalnamalar boıynsha qabyldanǵan sharalardyń nátıjesinde 150 adam anyqtalyp, jaýap alyndy. Olar saıttyń top-menedjerlerine júıeli túrde aqsha aýdaryp otyrǵandaryn rastady.

Saraptama negizinde saıttaǵy materıaldar pornografııalyq sıpattaǵy týyndyǵa jatatyny anyqtaldy, sondaı-aq aqyly jynystyq qyzmetterdi izdep, paıdalanýǵa arnalǵan.

Astana, Almaty, Pavlodar qalalarynda júrgizilgen tintý sharalarynyń nátıjesi boıynsha 23 mln teńgeden astam aqsha, onyń ishinde krıptovalıýta, avtomashınalar, kompıýterler, uıaly telefondar jáne basqa da tsıfrlyq tasymaldaǵyshtar tárkilenip alyndy.

Sot kompıýterlik-tehnıkalyq saraptama taǵaıyndaldy. Qylmystyq kodekstiń 309-baby («Jezókshelikpen aınalysý úshin prıton uıymdastyrý nemese ustaý jáne jeńgetaılyq») boıynsha sotqa deıingi tergeý júrgizilip jatyr.

Qazirgi ýaqytta múddeli memlekettik organdarmen birlesip, paıdalanýshylardyń veb-saıtqa qoljetimdiligin buǵattaý boıynsha sharalar qabyldana bastady.