Qytaımen shekaradaǵy «Nur Joly» ótkizý beketinde 2,3 myń júk kóligi tur
Ótkizý-baqylaý beketindegi kúrdeli jaǵdaıdy sheshý jáne mundaǵy quqyqtyq tártipti retteý úshin Panfılov aýdany ákimdiginde jedel shtab quryldy.
«Pandemııaǵa baılanysty Qytaı Halyq Respýblıkasy ózge elderden qabyldaıtyn kólik sanyn qysqartty. Sonyń saldarynan ótkizý beketinde júk avtokólikteriniń keptelisi oryn aldy. Búgingi tańda onyń uzyndyǵy 58 shaqyrymdy qurady, jalpy sany – 2 myń 366 júk kóligi.
Aýdan ákimi tez arada jedel shtab qurdy. Shtabqa keden qyzmeti, shekara qyzmeti, polıtsııa bólimi, sondaı-aq júrgizýshiler quramynan belsendiler engizildi. Bul jerde atalǵan ótkizý beketindegi problemalar talqylanady jáne sheshiledi.
Jedel shtabtyń kúndelikti otyrystary barysynda qalyptasqan jaǵdaı turaqtaldy. Atalǵan ýchaskede qoǵamdyq tártipti buzý, jol-kólik oqıǵalary tirkelgen joq. Sonymen qatar, júrgizýshilermen zań talaptaryn múltiksiz saqtaý jáne usaq quqyq buzýshylyqtarǵa jol bermeý týraly quqyqtyq túsindirý jumystary turaqty túrde júrgizilýde», - dedi Almaty oblysy Panfılov aýdandyq polıtsııa bólimi bastyǵynyń birinshi orynbasary Jandos Kavlıev.
Sonymen qatar, jedel shtabtyń belsendi jumysy jáne júk kólikteriniń júrgizýshilerimen tyǵyz qarym-qatynas nátıjesinde ótkizý beketinen jedel ótý úshin óz qyzmetterin usynatyn deldaldardyń zańsyz áreketteri áshkere bolǵan.
«Júrgizýshilerdiń ózderi jalpy kezekti «aınalma jolmen» ótýdi qalap, suranys týdyrmaǵany abzal. Qazirdiń ózinde deldaldar qatarynan birneshe adam jaýapkershilikke tartyldy. Sonymen qatar, patrýldik polıtsııa jasaqtary «Nur Joly» beketiniń mańynda jol qaýipsizdigin qamtamasyz etý barysynda jol qozǵalysy erejelerin óreskel buzý derekterin anyqtady. Quqyq buzýshylarǵa ákimshilik zańnama talaptaryna sáıkes sharalar qabyldandy. Bul jerdegi jaǵdaı turaqtandy jáne baqylaýda», - dedi podpolkovnık Kavlıev.