Qytaımen shekaradaǵy «Nur Joly» beketinde elektrondy kezek brondarynyń merzimi uzartyldy
Memlekettik shekara arqyly júk kólikteriniń ótýin yńǵaıly etý jáne tsıfrlandyrý úshin Memlekettik kirister komıteti «Nur Joly» ótkizý beketinde 2022 jylǵy 10 naýryzdan bastap 31 jeltoqsanǵa deıin «E-border.kz» platformasy bazasynda elektrondy kezekti engizý jónindegi pılottyq jobasyn júzege asyrdy.
Búginde «Nur Joly» ótkizý beketinde Qoldau.kz («CarGoRuqsat» mobıldi qosymshasy) saıtyndaǵy QR Qarjy mınıstrliginiń «Aqparattyq-esepteý ortalyǵy» AQ platformasynyń elektrondy kezek júıesi iske qosylǵan. Bul júıeniń ózge memlekettik organdardyń aqparattyq júıelermen 15 ıntegratsııasy bar, ıaǵnı kezek alý kezindegi yqtımal aıla-sharǵylardy boldyrmaýǵa múmkindik beredi.
Qazirgi tańda «Qoldau.kz» júıesine buǵan deıin «E-border.kz» arqyly alynǵan shamamen 19 803 kólik kezegi kóshirildi.
«E-border.kz» servısindegi brondalǵan kezekter sanynyń aıtarlyqtaı kóptigine baılanysty, sonymen birge bekettegi ótkizý múmkindigin eskere otyryp, memlekettik organdar buǵan deıin berilgen kezekterdiń jaramdylyq merzimin arttyryp, esesine kelesideı úlestirý mehanızmin engizý týraly sheshim shyǵardy.
2023 jyldyń 31 qańtary men 1 naýryzy aralyǵynda – «Qoldau.kz» platformasynda 70 kólik «E-Border.kz» arqyly alynǵan eski kezekpen ótedi. Sondaı-aq, tez buzylatyn taýarlar tıelgen, eksporttyq nemese gabarıtti júkter jáne elektrondy kezektiń Ýaqytsha ótkizý syzbasyna saı keletin ózge de kategorııaǵa jatatyn 30 kólik ótkizilmek.
2023 jyldyń 1 naýryzynan keıin bul araqatynas ózgertilip, bekettiń ótkizý múmkindigi arta túsedi. Eski kezektegi 70 jáne odan da kóp avtokólik («E-Border.kz»), 30 avtokólik – kezekten tys tártip boıynsha, taǵy 30 jáne odan da kóp kólik jańa «CarGoRuqsat» arqyly kezek alǵandar. Bul júıe QHR men QR ótkizý beketteriniń ótkizý múmkindigine saı, «E-Border.kz» servısindegi barlyq kezek aıaqtalǵansha túzetilip otyrady (atalǵan ótkeldegi jobalyq qýattylyq –táýligine 1 100 ATS).
Usynylyp otyrǵan syzba barlyq taraptyń, ıaǵnı kezekti retteýdiń tıimdi quraldaryn engizý boıynsha memlekettiń de, syrtqy saýda qyzmetiniń buǵan deıin kezek alyp qoıǵan jáne endi kezek alýǵa nıettenip júrgen qatysýshylarynyń da múddesin kózdeıdi.
Erejelerge saı, jańa «CarGoRuqsat» servısinde kólikterdi tirkeý atalǵan kólik quraly boıynsha qoldanystaǵy bron bolmaǵan jaǵdaıda, naqty aıtqanda «E-border.kz» tiziminde bolmaǵan jaǵdaıda múmkin bolmaq.
Komıtet tasymaldaýshylar men kólik quraldarynyń júrgizýshilerinen óz baǵytyn aldyn ala, ıaǵnı «CarGoRuqsat» qosymshasynda jarııalanatyn tizilimdegi kezektiń qozǵalysyn esepke ala otyryp josparlaýdy suraıdy. Kólik belgilengen kúni kelmegen jaǵdaıda kezektiń kúshi joıylyp, júrgizýshiler brondaý protsedýrasyn qaıta júzege asyrýǵa tıis bolady.
Buǵan deıin habarlaǵanymyzdaı, Qazaqstan Respýblıkasynyń kedendik shekarasyndaǵy 12 ótkizý pýnktinde elektrondy kezektiń avtomattandyrylǵan júıesi iske qosyldy.