Qytaımen shekarada «Nurly jol» ótkizý beketi salynady

ASTANA. QazAqparat - Qazaqstannyń Qytaımen shekarasyndaǵy «Batys Eýropa - Batys Qytaı» avtomagıstraliniń boıyna «Nurly jol» avtomobılder ótkizý beketi salynady, dep habarlaıdy «QazAqparat» HAA QR Qarjy mınıstrliginiń baspasóz qyzmetine silteme jasap.

«Búgin QR Qarjy mınıstri Baqyt Sultanov, Investıtsııalar jáne damý mınıstri Jeńis Qasymbek, «Eurotransit Terminal» JShS dırektory Erlan Dıhanbaev «Batys Eýropa - Batys Qytaı» avtojolynyń bóliginde «Nurly jol» avtomobıl ótkizý beketin turǵyzý boıynsha ózara túsinistik pen yntymaqtastyq jónindegi memorandýmǵa qol qoıdy», - delingen vedomstvo habarlamasynda.

Qujatqa qol qoıý Kazakhstan Global Investment Roundtable ınvestıtsııalyq forýmy aıasynda ótti.

Memorandým Qytaımen shekaradaǵy halyqaralyq «Batys Eýropa - Batys Qytaı» avtomagıstarli boıyndaǵy «Nurly jol» ótkizý beketiniń qurylysyn jeke seriktester júrgizýin qarastyrady. Sonymen qatar, Eurotransit Terminal ótkizý beketiniń qurylysy men aldaǵy qyzmet kórsetý sapasyna jaýapkershilikti óz moınyna aldy.

Joba memlekettik-jekeshelik seriktestik aıasynda júzege asyrylmaqshy.