Qytaımen saýda-ekonomıkalyq zertteýler týraly memorandýmǵa qol qoıyldy

ASTANA. QazAqparat – Memleket basshysy Qasym-Jomart Toqaevtyń Qytaı Halyq Respýblıkasyna memlekettik sapary aıasynda Qazaqstan men Qytaı tarapy saýda-ekonomıkalyq zertteýler salasyndaǵy ózara túsinistik týraly memorandýmǵa qol qoıdy, dep habarlaıdy QazAqparat Úkimettiń resmı saıtyna silteme jasap.

Memorandým Qazaqstan-Qytaı saýda-ekonomıkalyq yntymaqtastyǵyn sapaly jańa deńgeıde odan ári ilgeriletýge jáne damytýǵa, onyń ishinde eki eldiń ǵylymı uıymdary arasyndaǵy áriptestik baılanystardy úılestirýge baǵyttalǵan. Qujatqa QR Premer-Mınıstriniń orynbasary - Saýda jáne ıntegratsııa mınıstri Serik Jumanǵarın jáne QHR Kommertsııa mınıstri Van Ventao qol qoıdy.

Qujat «Saýda-ekonomıkalyq strategııalar ortalyǵy» qoǵamdyq qory (Qazaqstan) men QHR kommertsııa mınıstrliginiń halyqaralyq saýda-ekonomıkalyq yntymaqtastyq akademııasy arasynda qajetti zertteýler, birlesken taldamalyq jáne basqa da sholýlar júrgizýdi, ozyq tájirıbe men aqparat almasýdy kózdeıdi. Zertteý baǵyttary – bıznes-ortany jaqsartý turǵysynan ekijaqty saýda, elektrondyq kommertsııany, Qazaqstan men Qytaıdyń tranzıttik jáne logıstıkalyq áleýetin damytý, arnaıy ekonomıkalyq aımaqtar ınstıtýtyn jetildirý, «jasyl» damý, jańa energetıka jáne ekijaqty saýda-ekonomıkalyq yntymaqtastyqtyń basqa da mańyzdy máseleleri.

Sondaı-aq, ózara túsinistik týraly memorandým saýda-ekonomıkalyq zertteýler salasyndaǵy yntymaqtastyqty yntalandyrýǵa yqpal etýge jáne ózara saýdanyń áleýetin arttyrýdyń tásilderi men tetikteri boıynsha usynystar ázirleýge, ınnovatsııalyq damýǵa járdemdesýge, jańa tehnologııalardy paıdalanýǵa baǵyttalǵan jáne basqa da birlesken is-sharalardy ótkizý múmkindigi qarastyrylǵan.