Qytaılyq qazaq boksshysy chempıondyq tıtýldy jeńip aldy

NUR-SULTAN. QazAqparat - Qytaıdyń Shyńjań óńirinde týyp-ósken ulty qazaq kásipqoı boksshy Ulan Tóleǵazyuly (10-3-1,4 KO) kezekti jekpe-jeginde chempıondyq beldikti jeńip aldy, dep habarlaıdy QazAqparat.

Qytaılyq sohu.com sport portalynyń habarlaýynsha, eń jeńil salmaqta (50.8 kg) judyryqtasatyn Ulan Tóleǵazyuly Shanhaı qalasyndaǵy boks keshinde jeńilip kórmegen japondyq boksshy Rıota ıAmaýchımen (4-0-0, 4KO) WBA tujyrymy boıynsha halyqaralyq chempıon tıtýlyn (WBA International Flyweight Title) sarapqa saldy.

12 raýndqa sozylǵan tartysty jekpe-jekte, qandasymyz qarsylasyn bir ret nokdaýnǵa túsirgenimen, 6 raýndta ózi de bir ret nokdaýn alyp qaldy. Alaıda, eki boksshy da jeńis úshin aıanbaı judyryqtasyp, qorytyndysynda basymdyq tanytqan qazaq boksshysy tóreshiler sheshimimen jeńiske jetti. Esep 115/112,117/109,117/109.

Osylaısha Ulan Tóleǵazyuly eń jeńil salmaqta úsh birdeı boks uıymynyń chempıondyq tıtýldaryn ıelendi. Buǵan deıin ol WBC tujyrymy kúmis beldigi (WBC Silver Flyweight Title) jáne WBO tujyrymy Azııa-Tynyq muhıt chempıony (WBO Asia Pacific Flyweight Title) beldikterin jeńip alǵan bolatyn.