Qytaıǵa joıqyn taıfýn tónip keledi

BEIJІŃ. QazAqparat – Shyǵys jáne Ońtústik Qytaıdyń jaǵalaý aımaqtarynda daýyldyń maksımaldy «qyzyl deńgeıi» jarııalandy. Sebebi juma kúni «Doksýrı» qýatty taıfýny tónedi dep kútiledi. Bul týraly Qytaıdyń Ortalyq meteorologııa qyzmeti málim etti, dep habarlaıdy QazAqparat menshikti tilshisi.

Meteorologııalyq boljamdarǵa sáıkes, «Doksýrı» taıfýny materıktik Qytaıǵa bet buryp, soltústik-batys baǵytta jyljyp, Fýtszıan, Gýandýn, Chjetszıan, Anhoı, Tszıansı jáne basqa da provıntsııalarǵa áser etedi.

27 shilde tańǵy saǵat 06:00-degi jaǵdaı boıynsha, taıfýn Taıvan aralynyń ońtústik shetinen 220 shaqyrymdaı jerde bolyp, soltústik-batysqa qaraı 10-15 km/saǵ jyldamdyqpen jyljyp keledi.

Taıfýn juma kúni tańerteń Fýtszıan jáne Gýandýn provıntsııalarynyń jaǵalaý aımaqtaryna jetedi dep kútilýde.

Meteorologtardyń boljamynsha, taıfýnnyń qarqyndylyǵy materıktik Qytaıǵa jaqyndaǵan saıyn arta túsedi, osy ýaqytqa deıin onyń ortalyq bóligindegi jeldiń jyldamdyǵy 52 m/s jetken.

QHR tótenshe jaǵdaılardy basqarý mınıstrligi qazirgi ýaqytta joǵary daıyndyq jaǵdaıynda turǵan 4 myńnan astam adam men tehnıkany jumyldyrdy. Bılik turǵyndarǵa sý tasqyny men kóshkin qaýpi týraly eskertti.