Qytaıǵa qansha munaı tasymaldandy

ASTANA. QazAqparat - 2006 jyldan beri «Atasý - Alashankoý» munaı qubyrymen Qytaıǵa 100 mln tonnadan astam munaı eksporttaldy, dep xabarlaıdy QazAqparat tilshisi.

China National Petroleum Corporation (CNPC) dırektordyń orynbasary Tsın Veıchjýnnyń aıtýynsha, atalǵan kompanııa Qazaqstanda jyl saıyn 20 mln tonna shıki munaıdy óndirip otyrady. Al «QazTransGaz» ulttyq kompanııasymen birlese otyryp, «Beıneý-Bozoı-Shymkent» gaz qubyry salyndy. Ol arqyly gazdy tasymaldaý kólemi 230 mlrd tekshe metrge jetti. Budan bólek, «Atasý-Alashankoý» munaı qubyry paıdalanýǵa berildi. 2006 jyldan beri ol arqyly Qytaıǵa 110 mln tonna munaı eksporttaldy.

«CNPC Shymkent munaı óńdeý zaýytyn jańǵyrtý sharalaryna qatysyp keledi. Osy jumystyń ekinshi kezeńi sátti aıaqtaldy. Qazaqstanda biz 42 mlrd teńgeniń salyǵyn tóledik. Áleýmettik jaýapkershilik qaǵıdattaryn da saqtap kelemiz. Osy ýaqytqa deıin 30 myń adamǵa jumys berdik. Biz osy saladaǵy yntymaqtastyq baılanystardy ary qaraı nyǵaıtýǵa daıynbyz», - dedi Tsın Veıchjýn Astanada ótken qazaq-qytaı bıznes forýmynda.

«QazMunaıGaz» ulttyq kompanııasynyń tasymaldaý jónindegi basqarýshy dırektory Nurtas Shmanovtyń sózine qaraǵanda, qazirgi kezde Qytaıǵa Aqtóbe men Qumkóldiń munaıy tasymaldanady. Sondaı-aq Batys Qazaqstannyń shıkizatyn jetkizý jaıy pysyqtalyp jatyr.
«Byltyr biz CNPC-men naqty kelisimge keldik. Oǵan sáıkes, «Keńqııaq-Atyraý» munaı qubyryna revers jasalady. Joba boıynsha kelisim bar. Osylaısha, munaı qubyrynyń «Keńqııaq-Aqtaý» baǵytyn, kerisinshe «Atyraý-Keńqııaq» jaqqa buramyz. Sonyń arqasynda Batys Qazaqstannyń munaıyn Qytaıǵa tasymaldaı alamyz», - dep atap kórsetti N.Shmanov.

Aıta keteıik, búgin Astanadaǵy «Rıksos» qonaq úıinde qazaq-qytaı bıznes forýmy ótti.  Atalǵan shara «Bir beldeý - bir jol» bastamasynyń bes jyldyǵyna arnalyp otyr. Búginde QHR osy bastamanyń boıynda ornalasqan 25 memleketpen tyǵyz qarym-qatynas ornatyp, ózara saýda-sattyqty 605 mlrd dollarǵa jetkizdi. Sonyń ishinde Qazaqstan men Qytaı arasyndaǵy saýda aınalymy 10 mlrd dollardy quraıdy.

QR Prezıdenti Nursultan Nazarbaev búgingi forým qatysýshylaryna óz quttyqtaýyn joldady. Qytaı Halyq Respýblıkasynyń Tóraǵasy Sı Tszınpın da úndeý joldap, Qazaqstannyń Prezıdenti Nursultan Nazarbaevqa óz rızashylyǵyn bildirdi.  Al QHR Kommertsııa jónindegi vıtse-mınıstri Jen Hýnbınniń aıtýynsha, Qazaqstan men Qytaı saýda-sattyqty dollarsyz júrgizýdi kózdeıdi.