Qytaıǵa eksportalatyn gazdan Qazaqstan qansha paıda tabady

ASTANA. QazAqparat - Qytaıǵa gaz eksporttaýdan qazaqstandyq kompanııalar 1 mlrd dollarǵa jýyq paıda tabady. Bul týraly búgin qazaqstandyq gazdy «Beıneý-Bozoı-Shymkent» magıstraldy gaz qubyrynan «Ortalyq Azııa - Qytaı» transulttyq gaz qubyryna jiberý saltanatty rásiminde QR Energetıka mınıstri Qanat Bozymbaev aıtty, dep habarlaıdy QazAqparat.

«Qazaqstan men Qytaı tarapy bekitken kelisimshart negizinde 1 jyldyń ishinde Qytaıǵa qaraı 5 mlrd tekshe metr  gaz eksporttalatyn bolady. Jalpy, bıyl elimizde 40 mlrd teshke metrden astam gaz óndiriletin bolady. Onyń 16 mıllıardy eksportqa shyǵarylsa, ishki naryqta 13-14 mıllıardy paıdalanylady.  Al qalǵan gazdyń kólemi uńǵymalarǵa qaıta aıdalady. Eń bastysy búgin tarıhı mańyzy bar oqıǵa oryn alyp otyr», - dedi mınıstr.

Onyń paıymynsha, Qazaqstan kógildir otyndy buǵan deıin Reseı arqyly tek Eýropaǵa eksporttap kelse, endi tikeleı Qytaı naryǵyna shyǵý arqyly gaz naryǵy salasynda óziniń erkindigin alyp otyr.

«Qytaıǵa eksporttalatyn gazdyń baǵasy kommertsııalyq qupııa. Ony aıta almaımyn. Biraq, baǵasy durys dep esepteımin. Al bul eksporttyń ishki naryqtaǵy gazdyń baǵasyna esh qatysy joq. Jalpy aıtqanda gaz óndiretin kompanııalar jáne «QazTransGazǵa» qatysy bar kompanııalar, máselen Qytaımen birlesken kásiporyndar bul kelisimsharttyń negizinde 900 mln  dollardan astam paıda alady», - dedi Qanat Bozymbaev.