Qytaıdyń Tarbaǵataı aımaǵynda aqyndar aıtysy ótti
QHR Іle qazaq avtonomııalyq ólkesiniń Tarbaǵataı aımaǵyna qaraıtyn 5 aýdan 2 qaladan jınalǵan óner ıeleriniń basyn qosqan aqyndar aıtysy men mádenı týrızm merekesi 3 kún boıy Toly aýdanynyń Qońyroba sazy jaılaýynda merekelendi. Aýqymdy mádenı sharada aqyndar aıtysy, terme aıtý, kúı, sybyzǵy, qobyz tartý, qazaq kıiz úıiniń ásemdigin baǵalaý jarystary ótkizildi. Ulttyq sport túrlerinen kókpar tartý, teńge ilý, qyz qýý oıyndary, 23 shaqyrym jáne 9 shaqyrymdyq báıge, 6 shaqyrymdyq túıe jarysy, balýandar kúresi, doıby, shahmat jarystary ótkizildi. Sondaı-aq qolóner buıymdary, ulttyq kıim-keshek, azyq-túlik, kıiz úı mádenıeti kórmesi kórsetildi.
Sharanyń sońǵy kúni ár ónerden baby men baǵy qatar ozǵan júldegerlerdiń esimderi atalyp, marapattaldy. Aqyndar aıtysynyń bas júldesi Saýan aýdanynyń aqyny Naǵman Shuqanulynyń qanjyǵasyna baılandy. Osylaısha sán-saltanaty jarasqan, án men jyrǵa ulasqan óner toıy mejeli máresine jetti. Eki jyl saıyn ótkizilip kele jatqan aımaqtyń dástúrli aqyndar aıtysynyń kelesi kezegi 2019 jyly Dórbiljiń aýdanynda ótetin bolyp, aıtys týyn aýdan ákimi Maqsutqan Jamsapuly qabyldap aldy.