Qytaıdyń taǵy bir megapolısi mıllıarderler sany boıynsha Nıý-Iorkti basyp ozdy

BEIJІŃ. QazAqparat - Qytaıdyń ońtústigindegi Gýandýn provıntsııasyndaǵy Shenchjen qalasy mıllıarderler sany boıynsha Nıý-Iorkti basyp ozdy. Bul týraly Hurun Report zertteý ınstıtýtynyń álemdegi eń baı mıllıarderler reıtıngin jarııalaǵan baıandamasynda aıtylǵan, dep habarlaıdy QazAqparat tilshisi.

Habarlamaǵa sáıkes, bir jylda Shenchjendegi eń baı adamdar tizimine segiz mıllıarder qosylyp, Qytaı megapolısindegi olardyń sany 113-ke jetip, Nıý-Iorkti basyp ozdy.

Mıllıarder turǵyndarynyń sany boıynsha qalalar tizimin Qytaıdyń megapolısteri bastap tur. Sońǵy málimetter boıynsha, 144 mıllıarder Beıjińde, Shanhaıda (121), Shenchjende (113) jáne Nıý-Iorkte (110), Londonda (101) turady.

Hurun Report Shenchjendegi mıllıarderlerdiń kóbeıýi aldaǵy jyldarda megapolıske odan da kóp jas kásipkerlerdi tartatyn úrdisti kórsetetinin atap ótedi. Shenchjenniń órleýi 1980 jyly «reformalar men ashyqtyq» saıasatynyń bir bóligi retinde Qytaı materıgindegi alǵashqy arnaıy ekonomıkalyq aımaq atalýynan bastaldy.

1979 jyldan 2021 jylǵa deıin Shenchjenniń jalpy ishki ónimi 475 mıllıard dollarǵa deıin ósti. Qalada Qytaıdyń eń iri tehnologııalyq kompanııalary, sonyń ishinde telekommýnıkatsııalyq alpaýyt Huawei jáne ınternet-konglomerat Tencent ornalasqan.

Jergilikti bıliktiń málimetinshe, ótken jyly Shenchjen qalasynda 2500 jańa joǵary tehnologııalyq kompanııa qurylyp, olardyń jalpy sany 17 myńǵa jetken.