Qytaıdyń soltústik-shyǵysynda sý tasqynynan 14 adam qaza tapty
1 tamyzdan bastap Tıantszın qalasy men onyń aınalasy «Doksýrı» sýpertaıfýny ákelgen qatty jańbyrdan zardap shekti. Jeksenbi kúni mýnıtsıpaldyq bılik Haıhe ózeniniń basseıninde eń joǵary «qyzyl» deńgeıdi jarııalady, onda 1963 jyldan bergi eń aýyr sý tasqyny boldy.
Ortalyq bılik Qytaıda sý tasqynynan zardap shekken aımaqtarǵa barlyǵy 520 mln ıýan (shamamen 72 mln dollar) bóldi. Saqtandyrý kompanııalary eldiń sý tasqynynan zardap shekken 16 aımaǵynda ótemaqy tóleýdi jedeldetti. Qazirgi ýaqytta 264 mln ıýan (shamamen 36 mln dollar) tólendi. Ótemaqy talaptarynyń jalpy somasy - 6,24 mlrd ıýan, bul - shamamen 8 866 mln dollar.
Aıta ketsek, 25 shildede Ońtústik Qytaıdyń Gýandýn provıntsııasynyń sý tasqyny men qurǵaqshylyqpen kúres shtaby «Doksýrı» taıfýny jaqyndap qalǵanyna baılanysty qaýipsizdik sharalaryn kúsheıtken edi.
27 shilde saǵat 6:00-degi jaǵdaı boıynsha, taıfýnnyń Taıvan aralynyń ońtústik shetinen 220 shaqyrymdaı jerde bolyp, soltústik-batysqa qaraı 10-15 km/saǵ jyldamdyqpen jyljyp kele jatqany habarlandy.
Qytaıdyń Fýtszıan provıntsııasynyń 700 myńnan astam turǵyny «Doksýrı» taıfýnynan zardap shekti. Keıin zardap shekkender sany 880 myńnan asty.
Al, 1 tamyzdaǵy jaǵdaı boıynsha Beıjińde «Doksýrı» sýper taıfýny ákelgen nóser jańbyr men sý tasqynynan 11 adam qaza taýyp, 27 adam iz-túzsiz joǵalǵan.
QHR qarjy jáne tótenshe jaǵdaılardy basqarý mınıstrlikteri birlesip, Beıjiń-Tıantszın-Hebeı aımaǵyndaǵy sý tasqynyna qarsy is-sharalarǵa jáne tabıǵı apat saldaryn joıýǵa 110 mln ıýan (shamamen 15,43 mln AQSh dollary) bóldi.
Sondaı-aq, QHR-dyń sý tasqyny men qurǵaqshylyqqa qarsy memlekettik shtaby «Hanýn» taıfýnynyń jaqyndaýyna baılanysty 4-deńgeıdegi jedel áreket etý rejımin iske qosty.
Qytaıdyń soltústigindegi Hebeı provıntsııasynda keıingi birneshe kúnde tolassyz jaýǵan jańbyr saldarynan 1,2 mıllıonnan astam adam evakýatsııalandy.