Qytaıdyń soltústik-batysynda 5,8 baldyq jer silkinisi boldy

BEIJІŃ. QazAqparat - Jeksenbide Qytaıdyń soltústik-batysyndaǵy Tsınhaı provıntsııasynyń Delınha qalasynyń janynda 5,8 baldyq jer silkinisi boldy, dep habarlaıdy QazAqparattyń menshikti tilshisi Qytaı seısmologııa ortalyǵyna silteme jasap.

Jerasty dúmpýleri Qytaıdyń soltústik-batysyndaǵy Tsınhaı provıntsııasy Delınha qalasynyń janyndaǵy Haısı-Mońǵol-Tıbet avtonomııalyq aýdanynda tirkeldi.

Jer silkinisiniń oshaǵy 8 km tereńdikte jatyr. Delınha qalasynda 90 myńǵa jýyq adam turady.

Zardap shekkender men qıraýlar týraly aqparat túsken joq.

Tsınhaı provıntsııasy - Tsınhaı-Tıbet taýlarynyń soltústik-shyǵys bóliginde, teńiz deńgeıinen joǵary bıiktikte ornalasqan, seısmıkalyq qaýipti aımaq.

Esterińizge sala keteıik, senbi kúni tústen keıin Beıjińde 2,0 baldyq jer silkinisi boldy.

Jerasty dúmpýleri megapolıstiń soltústik-batysyndaǵy Chanpın aýdanynda tirkeldi. Oshaǵy 15 km tereńdikte ornalasqan.

Qytaı astanasynyń osy aımaǵynda 2,26 mıllıonnan astam turǵyn turady.