Qytaıdyń «Shenchjoý-12» ǵarysh kemesiniń kapsýlasy 3 ǵaryshkerdi Jerge jetkizdi

EIJІŃ. QazAqparat – Bortynda úsh ǵaryshker bar «Shenchjoý-12» pılottyq ǵarysh kemesiniń kapsýlasy Qytaıdyń soltústigindegi Іshki Mońǵolııa avtonomııalyq aýdanyna qondy. Bul týraly juma kúni Sınhýa agenttigi jazdy, dep habarlaıdy QazAqparat menshikti tilshisi.

Habarlamaǵa sáıkes, alǵashqy ǵarysh stansasyn salýǵa orbıtaǵa jiberilgen úsh qytaılyq ǵaryshker úsh aılyq qyzmetin sátti aıaqtap, osy jumada Jerge oraldy.

Eske salaıyq, «Shenchjoý-12» Jerden 17 maýsymda ushyp ketti. Jergilikti BAQ-tyń jazýynsha, «Shenchjoý-12» pılottyq ǵarysh kemesiniń mıssııasy sátti aıaqtaldy. «Shenchjoý-12» pılottyq kemesi osy beısenbide Jerge qaıtý úshin Qytaı orbıta stansasynan bólindi. Qazirgi ekıpajdyń mindetine modýlge júk kemesimen jetkiziletin qurylǵylardy jınaý jáne qosý kirdi. Stansanyń qurylysy osy jyldyń sáýirinde bastalyp, 2022 jyly aıaqtalýy tıis. Stansa 340-450 shaqyrym bıikte jerge jaqyn orbıtada jumys isteıdi. Onyń qyzmeti 10 jylǵa josparlanǵan, biraq qytaılyq sarapshylar oǵan ýaqytyly jóndeý jumystaryn júrgizip tursa, 15 jylǵa deıin qyzmet etedi dep úmittenip otyr. Qytaı mamandarynyń aıtýynsha, stansanyń barlyq túıinin montajdaýǵa 11 ushyrylym qajet. Qurylǵynyń Jerge qonyp jatqan vıdeosyn myna siltemeden qaraýǵa bolady.

Avtory Rýslan Súleımenov