«Qytaıdyń qurt túspeıtin almasy qurtyp barady» - respýblıkalyq basylymdarǵa sholý
***
QR Prezıdenti Nursultan Nazarbaev keshe Aqmola oblysyna jumys saparymen bardy. Osyǵan oraı «Aıqyn» gazetiniń búgingi sanynda «Aqmola Astanany asyraı alady» degen taqyryppen maqala jarııalandy. Basylymnyń atap ótýinshe, Memleket basshysy irgesi elimizdiń bas qalasyna tıip turǵan, elimizdegi eń iri sharýashylyqtardyń qatarynda sanalatyn «Ijevskıı» óndiristik kooperatıvine at basyn buryp, sharýashylyqtyń tynys-tirshiligimen tanysty. Bul kooperatıv ónimniń 80 túrin shyǵarady. Negizinen qus órbitetin bul eńseli sharýashylyq Astanany, Qaraǵandyny, Semeıdi jáne Aqmola oblysynyń eldi mekenderin azyq-túliktiń osy túrimen qamtamasyz etip otyr. Tutas bir aýyldyń halqyn jumyspen qamtyp otyrǵan óndiristik kooperatıv jylyna 2 mıllıard teńgeniń ónimin shyǵarady. Sońǵy úsh jylda sharýashylyqty damytýǵa 1,6 mıllıard teńge ınvestıtsııa salǵan. «Ijevskııden» soń, Elbasy N.Nazarbaev jergilikti ashanaǵa bas suǵyp, aýyl turǵyndarymen júzdesti, aýyldardaǵy áleýmettik-ekonomıkalyq ahýal jaıynda ashyq áńgime-dúken qurdy», - dep jazady basylym.
Jaqynda Bilim jáne ǵylym mınıstri Baqytjan Jumaǵulov Almatyda «Joǵary oqý ornynyń úzdik oqytýshysy - 2010» memlekettik grantyn jeńimpazdarǵa tabystady. Osy baıqaýǵa baılanysty Bilim jáne ǵylym mınıstrligi Joǵary oqý oryndary jáne joǵary oqý oryndarynan keıingi bilim berý departamentiniń dırektory Serik Ómirbaevpen aradaǵy suhbat «Aıqyn» gazetiniń beısenbilik sanynda «Joǵary oqý oryndary áli de qysqartylady» degen taqyryppen berilgen. Basylymnyń barlyq saýaldaryna tuşymdy jaýap bergen ol: «Álemdegi jetekshi elderde 1 mln halyqtyń basyna shaqqanda 1-6 ýnıversıtetten keledi eken. Al Qazaqstanda 1 mln turǵynǵa 9,2 joǵary oqý ornynan keledi. Munyń ózi oqý oryndary jelileriniń artyq ekendiginiń dáleli. Árıne, bul bilim berý sapasynyń tómendeýine áser etedi. Arıfmetıkalyq esep boıynsha sanasaq 16 mln halqy bar Qazaqstandaǵy joǵary oqý oryndarynyń sany júzge jýyq bolady. Osyǵan baılanysty joǵary oqý oryndaryna ári qaraı qysqartý júrgizý durys sııaqty», - deıdi.
***
«Alash aınasy» gazetiniń jazýynsha, almanyń otany bolǵan Almatyda búginde aportty sabannyń arasyna túsip ketken ınedeı izdep tabý qıyn. Onyń ornyna qaı bazarǵa barsańyz da aldyńyzdan otandyq almanyń ornyna qytaılyq alma menmundalap shyǵa keledi. Al sol qurt túspeıtin qytaı almasynyń sapasy da alańdatarlyq. «Mamandar ol jaqtan keletin almalarǵa shamadan tys hımıkattar qosylatynyn aıtyp dabyl qaqsa da, ımport almadan bas tartyp jatqan eshkim joq. Biletinder ony parafınmen pisirgen desedi. Ras ta shyǵar. Al sol almalardyń árqaısysyn uqyptap, bólek-bólek oraǵan aq «dákelerin» tyshqannyń uıasyna tastasańyz, kemirgishterdi sespeı qatyrady. Onyń ishinde saqtalǵan almany jep júrgen adamdardyń da saý emesi sózsiz»,- dep jazady basylym. Jazylǵan jaıt jaıynda egjeı-tegjeıli maǵlumat alǵyńyz kelse, gazettegi «Qytaıdyń qurt túspeıtin almasy qurtyp barady» degen maqalaǵa nazar aýdaryńyz.
«Keshe Premer-Mınıstrdiń qatysýymen ótken Úkimettiń otyrysynda Ekonomıkalyq damý jáne saýda mınınstrligi naqtylap ákelgen negizgi makroekonomıkalyq boljamdardy Úkimet músheleri qabyldady», - dep jazady «Alash aınasy» gazeti búgingi nómirindegi «Makroekonomıkalyq boljamdar qaıta naqtylandy» degen maqalasynda. Basylymnyń atap ótýinshe, atalǵan boljamdar barreline 65 dollar bolǵan munaı baǵasyn negizge alyp eseptelingen. Aǵymdaǵy jyly bul shıkizattyń eksport kólemi 5 mlrd. 515,2 mıllıon dollarǵa artpaq. ıAǵnı eksporttyń jalpy kólemi 59 mlrd. 058,4 mıllıon bolady. Sonymen qatar maqalada Mınıstrler kabıneti músheleriniń alqaly jıynda qabyldaǵan birqatar baǵdarlamalary jaıynda da jazylǵan.
***
«Biz Azıadada 32 altyn, 21 kúmis, 17 qola aldyq dep maqtanamyz-aý. Sol kúmis pen qola júlde ıegerleriniń biri Radık Japarov 10 jyldan beri qysy-jazy vagonda turatynyn bilesiz be? Azıadadan keıin Radıkke el sporty tizginin ustaǵan basshylar nemese Almaty qalasy ákimdigi páter kiltin beretin shyǵar dep oılaǵanbyz. Sóıtsek bermek túgili sportshyny arnaıy quttyqtaǵan sport fýnktsıoneri nemese atqamineri bolmaǵan eken», - dep jazady «Nur Astana» gazeti. Bul jaıt basylymǵa atalǵan sportshymen arada ótken suhbattan keıin belgili bolyp otyr. Baıraqty básekede qazaq eliniń namysyn qorǵaǵan sportshy jaıynda bilgińiz kelse, gazettiń búgingi sanynda «Kúmis júldeger vagonda turady» degen taqyryppen berilgen suhbatqa nazar salyńyz.
***
«Kazahstanskaıa pravda» gazetiniń jazýynsha, Úkimet Memleket basshysynyń «Bolashaqtyń irgesin birge qalaımyz!» atty aǵymdaǵy jylǵy Joldaýynda jáne «Nur Otan» partııasynyń HІІІ sezinde belgilegen strategııalyq maqsattardy júzege asyrýǵa kelesi aıdan bastap bilek sybana kirisýge qulshynyp otyr. Osyǵan oraı keshe «Nur Otan» HDP Ortalyq apparatynda partııanyń Parlament Májilisindegi fraktsııasynyń keńeıtilgen otyrysy ótip, onda 2011-2013 jyldarǵa arnalǵan respýblıkalyq bıýdjetke ózgertýler engizý týraly Úkimettiń usynysy maquldandy. «Otyrys barysynda Úkimettiń aýqymdy jumystardy atqarǵandyǵy atalyp ótildi. Barlyq máselelerdi sheshý júıeli sıpatqa ıe, al 2011-2013 jyldarǵa arnalǵan bıýdjet - áleýmettik sıpattyń jarqyn kórinisi», - dep jazady basylym.