Qytaıdyń Iý qalasynda úsh kúndik karantın engizildi
11:35, 12 Tamyz 2022
BEIJІŃ. QazAqparat - COVID-19-dyń jappaı taralýyna baılanysty shaǵyn kóterme saýdanyń astanasy atanǵan Iý qalasynda (Chjetszıan provıntsııasy) koronavırýske qarsy shekteýler engizildi, dep habarlaıdy QazAqparat tilshisi.
Jergilikti bıliktiń málimetinshe, 11 tamyzdan bastap Iý qalasynyń barlyq turǵyndary úshin úsh kúndik úı karantıni engizilgen. Ónerkásiptik óndiris jabyq tsıkl jaǵdaıynda jalǵasýy múmkin, bul kásiporyndardyń jumysshylarynan jumys ornynda qalýyn talap etedi.
Jergilikti BAQ-tyń habarlaýynsha, Iý ónimderi 210-nan astam el men aımaqqa eksporttalady. Qazaqstanǵa da osy «bazar qaladan» halyq tutynatyn taýarlar kóptep keledi. Pandemııaǵa deıin jyl saıyn Iý qalasyna 500 myńnan astam sheteldik bıznesmen taýar satyp alý úshin keletin.