Qytaıdyń iri megapolısinde lokdaýn engizildi

BEIJІŃ. QazAqparat – 13 mıllıon turǵyny bar Sıan qalasynda júzdegen adamnan koronavırýstyń delta-shtamy anyqtalǵan soń, Qytaı bıligi qalany karantınge jaýyp tastady, dep habarlaıdy QazAqparat tilshisi.

Beısenbi kúni Sıan qalasynyń halyqaralyq áýejaıy barlyq ishki 765 reısti toqtatty, kóptegen baǵyttar boıynsha poıyzdar júrmeıdi.

Beısenbiden bastap 2020 jylǵydaı qatań lokdaýn engizildi, megapolıs turǵyndaryna úıinen shyqpaýǵa nusqaý berildi.

Bir úıden bir adam eki kúnde bir ret qana dúkenge eń qajetti azyq-túlik alýǵa bara alady.

Sıandaǵy barlyq buqaralyq sharalar ótkizilmeıtin boldy. Kásiporyn qyzmetshileri qashyqtan jumys isteýge kóshirilip jatyr.

Qalada 3,5 myń mektep jabylyp, oqýshylar qashyqtan oqýǵa jiberildi.

Jergilikti BAQ-tyń jazýynsha, bilim beretin mekemelerdiń jabylýy 2 mıllıonnan astam adamǵa tikeleı áser etti.

Qazirgi tańda megapolıste epıdemıologııalyq qaýip joǵary bir aýdan jáne epıdemıologııalyq qaýip ortasha 40 aýdan bar.

Qaladan shyǵý úshin koronavırýs joq degen test sertıfıkaty men jergilikti bılikten hat kórsetý qajet.

9 jeltoqsannan beri Sıan qalasynda koronavırýs juqtyrýdyń 200-den astam oqıǵasy anyqtaldy.

Al sársenbi kúni bir táýlikte 127 adamnan vırýs tabylyp, eń joǵary kórsetkish tirkelgen.

Sıanda shekteý sharalaryn kúsheıtý elde Qysqy Olımpıada oıyndary men dástúrli túrde halyq kóp qydyratyn Qytaı jańa jyly qarsańynda koronavırýstyń taralýyn boldyrmaý úshn qajet.