Qytaıdyń ınternet-segmentinde Prezıdentimizdiń sózderi jıi tanymal bolyp jatady – Zarema Sháýkenova
QR Prezıdentiniń Qytaıǵa memlekettik sapary aıasynda 19 mamyrda Memleket basshysy «Ortalyq Azııa – Qytaı» sammıtine qatysady. Sapary aıasynda Qasym-Jomart Toqaev QHR Tóraǵasy Sı Tszınpınmen kelissóz júrgizdi. Onyń barysynda elderimiz arasynda strategııalyq áriptestikti odan ári nyǵaıtý, saýda-ekonomıka, ınvestıtsııa, kólik-logıstıka jáne energetıka salalarynda yntymaqtastyqty keńeıtý máseleleri qaralatyn bolady. Sondaı-aq mádenı-gýmanıtarlyq jáne ǵylymı baılanystardy tereńdete túsý asa mańyzdy
, – dedi Zarema Sháýkenova QazAqparat tilshisiniń saýalyna jaýap bere otyryp.
Sarapshy 2019 jyly ótken prezıdent saılaýynda jeńiske jetkennen keıin Qasym-Jomart Toqaev óziniń alǵashqy resmı saparyn Qytaı Halyq Respýblıkasyna jasaǵanyn eske saldy. Osy sapar aıasynda Memleket basshysy Qytaı qoǵamdyq ǵylymdar akademııasynda dáris oqydy. Prezıdent akademııa professorlary men sarapshylarynyń, qazaqstandyq stýdentterdiń aldynda sóılegen sózinde qoǵamdyq ǵylymdar kez kelgen memlekettiń damýyn aıqyndaıtynyn atap ótti. Qytaı qoǵamdyq ǵylymdar akademııasy QHR úshin memlekettik mańyzdy qurylym sanalady. Akademııanyń ortalyqtary men ınstıtýttary álemdik ǵylymı zertteýlerge eleýli úles qosyp keledi. Prezıdent Qasym-Jomart Toqaev Qazaqstan dostyq qarym-qatynastardy nyǵaıtýdy, kórshilerimen jáne basqa seriktestermen de ózara tıimdi yntymaqtastyqty damytýdy jalǵastyratynyn málim etti.
Eń birinshiden, bul dostarymyzǵa qatysty, Qytaı – Qazaqstan egemendigin, Táýelsizdigi men aýmaqtyq tutastyǵyn alǵashqylardyń biri bolyp moıyndaǵan bizge eń jaqyn memleketterdiń biri. Sondaı-aq QHR ıadrolyq derjavalar arasynda alǵashqylardyń qatarynda Qazaqstanǵa qandaı da bir aldyn ala shartsyz tıisti kepildikter berdi. Qazaqstan – Qytaı qarym-qatynasynyń damýyna «úsh zulymdyq kúshi» – dinı ekstremızm, separatızm jáne terrorızmmen kúres máselesindegi bizdiń ortaq ustanymymyz da yqpal etti. Bizdiń Prezıdent Qytaı qoǵamdyq ǵylymdar akademııasynda Qazaqstanǵa qatysty zertteýler júrgizetin jáne qazaq tilin jaqsy biletin sarapshylar bar ekenine erekshe nazar aýdardy. Halyq tiline qurmetpen qaraý – qarym-qatynastyń negizgi kilti ekeni sózsiz. Biz ınternet jelileriniń qytaılyq segmentinde Prezıdentimizdiń qytaı tilinde sóılegen sózderi qysqa rolıkter, úzindiler retinde jyldam jáne keńinen tarap ketetinin jıi baıqaımyz. Qytaıdyń kóptegen ınternet-qoldanýshylary Qasym-Jomart Toqaevtyń qytaı tilin jaqsy meńgergenin aıtyp jatady. Bálkim, álem kóshbasshylarynyń arasynda qytaı tilin jetik biletinder az shyǵar
, – dep toqtaldy Zarema Sháýkenova.
Onyń aıtýynsha, sınolog-ǵalym, Qytaıdyń Ortalyq Azııa elderimen qarym-qatynasyn zertteýshi Temir Omarov (Bishkek) óziniń taıaýda bergen suhbatynda Qazaqstannan basqa Ortalyq Azııa elderinde qytaıtaný salasy damymaı jatqanyna toqtalǵan edi.
Jalpy qazaqstandyq ǵylymnyń odan ári damýyna jáne onyń áleýmettik-gýmanıtarlyq baǵyttarynyń jańa serpinine Memleket basshysynyń QR Ulttyq ǵylym akademııasyna memlekettik mártebe berý týraly sheshimi yqpal etkeni sózsiz. Qazirgi ýaqytta Prezıdenttiń tıisti Jarlyǵymen QR Ulttyq ǵylym akademııasy QR Prezıdenti janyndaǵy uıym mártebesin aldy. Al Memleket basshysynyń Qytaıǵa memlekettik sapary elder arasyndaǵy ózara tıimdi yntymaqtastyqty odan ári nyǵaıtýǵa yqpal etetin bolady
, - dep túıindedi Zarema Sháýkenova.