Qytaıdyń eski kólik naryǵy koronavırýsqa baılanysty quldyrady

BEIJІŃ. QazAqparat – Qytaıda paıdalanylǵan jeńil avtomobılder satylymy tómendeı bastady. Bul úrdis áli de jalǵasýda. Bul týraly Qytaılyq avtomobıl dılerler qaýymdastyǵy málim etti, dep habarlaıdy QazAqparat menshikti tilshisi.

Qaýymdastyqtyń málimetinshe, Qytaıda paıdalanylǵan avtomobılderdiń satylymy naýryz aıynda 16%-ǵa, 1,32 mıllıon kólikke deıin tómendedi. Jasalǵan mámileler quny 14,24 mlrd dollardy qurady.

Ótken aıda birqatar dılerler óz qyzmetin toqtatty. Qytaılyq avtomobıl dılerleri qaýymdastyǵy eldegi paıdalanylǵan avtomobılder naryǵy koronavırýs indetine baılanysty jaqyn arada asa jandanbaıtynyn atap ótti. Sáýir aıynda mámileler kólemi 10% - dan asady (ótken jyldyń sáıkes kezeńimen salystyrǵanda) dep kútilýde.

Sonymen birge, COVID-19 pandemııasyna deıin qytaılyq avtodılerler paıdalanylǵan avtomobılderdi shetelge satý geografııasyn keńeıte bastaǵanyn atap ótken jón. Buǵan Qytaı bıliginiń 2019 jyly satylǵan barlyq avtokólikterge shyǵaryndylardyń qatań standarttaryn engizýi sebep boldy.

Jergilikti BAQ jazǵandaı, 2019 jyly qytaılyq avtodılerler Kambodja, Nıgerııa, Mıanma jáne Reseı sııaqty elderge paıdalanylǵan avtomobılderdi eksporttaı bastady. Qytaıdyń avtokólik dılerleri Afrıka elderinde paıdalanylǵan kólikterdi satýdyń keń perspektıvalaryn kóredi.

Sonymen qatar, iri qytaılyq avtokólik óndirýshilerdiń biri BYD Co. Ltd. kompanııasy naýryzda óz bıznesin tolyǵymen elektr kólikterine qaıta baǵyttap, qatty otynmen júretin kólikterdiń óndirisin toqtatty.

2021 jyly BYD Co. Ltd birinshi ret ishten janý qozǵaltqyshtary bar kólikterge qaraǵanda elektr kólikterin kóbirek satty. Ótken jyly BYD elektromobılderin satý kólemi 200% - dan astam ósimmen 600 myń birlikten asty.