Qytaıdyń Chendý qalasynda ótken marafonda qandasymyz bas júldeni jeńip aldy
BAQ jarııalaǵan aqparatqa qaraǵanda, 20 qarasha kúni 10 myńnan astam sportshy Chendý marafon jarysyna qatysqan.
Osy marafonda Shyńjańnyń Altaı aımaǵynan kelgen Edil Nurbolatuly 1 saǵat 8 mınýt 43 sekýnd nátıjemen bıylǵy Chendý jartylaı marafon jarysynda erler tobynda bas júldeni jeńip aldy.
Bul - onyń alǵash ret memlekettik deńgeıdegi marafon jarysyna qatysýy.
«Edil Nurbolatuly 19 jasta. Kishkentaıynan júgirýge qyzyqqan. Edildi ákesi Altaı aımaqtyq jeńil atletıka komandasyna kásiptik tárbıege beredi. 2019 jyly Shyńjań Uıǵyr avtonomııaly ólkelik jasóspirimderdiń jeńil atletıka jarysynyń 3000 metr jáne 5000 metr aralyqqa júgirý jarysynda bas júlde alǵan. Sodan keıin Shyńjań ólkelik sport jáne dene shynyqtyrý isteri mekemesiniń dene tárbıe 1-shi úlken komandasyna qabyldanyp jattyǵýyn jalǵastyrdy», dep jazady qytaılyq BAQ.
CNR dereginshe, 2022 jyly 28 qazan kúni Qytaıdyń Jyjııań ólkesiniń Chýıjoý qalasynda ótken memlekettik jeńil atletıka jarysynda Edil Nurbolatuly 3 mınýt 48 sekýnd nátıjesimen 1500 metrge júgirý jarysynda úshinshi bolsa, 5000 metrlik jarysta 14 mınýt 18 sekýnd nátıjesimen tórtinshi boldy.
Osylaısha óziniń sport tarıhyndaǵy eń joǵary nátıjesin kórsetken.
Qazir ol búkil Qytaı eli boıynsha erler arasynda 5000 metrge júgirý jalpy tiziminde 16-shy orynda, al 1500 metr boıynsha 8-shi orynda tur.
Eske sala keteıik, buǵan deıin Beıjiń marafonynda qandasymyz Eleýbek Qýanuly top jarǵan bolatyn.
Foto: mp.weixin.qq.com