Qytaıdyń avtokólik brendteri Qazaqstanda zaýyt ashýǵa qyzyǵýshylyq tanytýda - mınıstr

ASTANA. QazAqparat – Qazaqstan osynda zaýyt ashqysy keletin qytaılyq úsh avtomobıl brendimen kelissóz júrgizip jatyr. Bul týraly Májilistegi Úkimet saǵatynan keıingi baspasóz máslıhatynda Indýstrııa jáne ınfraqurylymdyq damý mınıstri Qaıyrbek Óskenbaev aıtty, dep habarlaıdy QazAqparat tilshisi.

Mınıstrdiń aıtýynsha, bul turǵyda Qytaıdyń tanymal brendteri qamtylmaq.

Sonymen qatar Q. Óskenbaev elimizde kólik alýǵa tómen paıyzben nesıe berý baǵdarlamasy aıasynda qalyptasqan kezekke qatysty pikir bildirdi.

«Osy oraıda elimizde shyǵarylatyn kólik sanyn arttyryp jatyrmyz jáne otandyq óndiristegi avtomobılderge suranys ósip keledi. Atap aıtqanda, elimizde shyǵarylatyn kólik sanyn áli de kóbeıtý kerek», - dedi mınıstr.

Budan buryn habarlanǵandaı, Qaıyrbek Óskenbaev elordadaǵy LRT qurylysyna qatysty pikir bildirdi.