Qytaıdyń álemdik ekonomıkanyń ósýine qosqan úlesi 1/3-ten asady - HVQ

BOAO. QazAqparat - Qytaıdyń álemdik ekonomıkanyń ósýine qosqan úlesi 2023 jyly 1/3-ten asady. Bul týraly QHR Memlekettik keńesiniń Premeri Lı Tsıanmen Boao Azııa forýmy (BAF) alańynda ótken kezdesý barysynda Halyqaralyq valıýta qorynyń (HVQ) basqarýshy dırektory Krıstalına Georgıeva málimdedi, dep habarlaıdy QazAqparat tilshisi.

HVQ basshysynyń aıtýynsha, Qytaı ekonomıkasy qarqyn alýda jáne bıyl onyń álemdik ekonomıkanyń ósýine qosqan úlesi 1/3-ten asady, osylaısha basqa elder úshin mańyzdy múmkindikter týady.

Qor Qytaımen makroekonomıkalyq saıasatty retteý salasyndaǵy yntymaqtastyqty tereńdetýge, saýdanyń bólshektenýine jol bermeýge jáne damýshy elderge qaryz daǵdarystarymen kúresýge kómektesýge daıyn, osylaısha álem turaqty jáne qaýipsiz bolady.

Óz kezeginde QHR Memlekettik keńesiniń premeri Lı Tsıan bıylǵy jahandyq ekonomıkalyq jaǵdaı optımızmge ıtermelemeıtinin jáne boljaý múmkin emes faktorlardyń bar ekenin atap ótti. Kúrdeli syn-qaterler jaǵdaıynda halyqaralyq qaýymdastyq makroekonomıkalyq saıasatty úılestirýdi kúsheıtip, jahandyq óndiris pen jetkizý tizbeginiń qaýipsizdigi men turaqtylyǵyn saqtaýy qajet ekenin de aıtyp ótti.

«Bizdiń ónimdilikti jaqsartýǵa jáne jyl saıynǵy damý maqsattaryna qol jetkizýge úles qosýǵa senimimiz ben múmkindigimiz bar», - dedi ol.

28-31 naýryz aralyǵynda Qytaıda jyl saıynǵy Boao Azııa forýmy ótedi.

Osyǵan deıin AHQO basshysynyń Boao azııalyq forýmy aıasyndaǵy paneldik sessııaǵa qatysqany habarlandy.

Rýslan Súleımenov