Qytaıdan kúıshi Saırash Jarmuhametuly quttyqtaıdy: Ómirimniń máni de, sáni de - dombyra
Álemniń qaı buryshynda júrse de «Naǵyz qazaq - dombyra!» degen ustanymmen ómir súretin qazaq halqy úshin ata mura dombyranyń alar oryny erekshe! Kósheli kúıshi, Qytaı jerinde keńinen tanylǵan Saırash Jarmuhametulynyń aqjarma tileginde, Altaı jerindegi kúıshilik mektep týraly oı órbitip jáne dombyra kúni merekesiniń dástúrli tól ónerimizdi ulyqtap, qoǵamǵa, jas urpaqqa nasıhattaýda mańyzy erekshe ekenin aıtqan.
«Altaı Túrki jurtynyń kindik mekeni. Sondyqtanda erte zamandardaǵy mádenıetimizdiń kóne iz-sorabyn Altaı jerinen izdegenimiz abzal. Kúı týraly aıtar bolsaq ta, bul óńirde eń ejelgi, kóneden kele jatqan halyqtyq, ańyz kúıler kóptep kezdesedi. Ol kúılerden eski zamandardaǵy qońyr úndi dybystardy ańǵarasyń. Osy óńirde damyp, búginge jetken Altaı-Tarbaǵataı kúıleriniń úzdik ókilderi dep Baıjigit, Beısenbi Dónenbaıuly, Shalap Saýdageruly, Qaıraqbaı Shálekenuly, Taıyr Belgibaıuly sekildi dáýlesker kúıshilerdi ataýǵa bolady. Al osy kúıshilerdiń dástúrin jalǵastyrǵan saýsaǵynan kúı saýlaǵan, Qytaı qazaqtarynyń ortasynda keń tanylǵan Dáýlet Halyquly - meniń aýyldasym ári ustazym boldy. Men Dáýlet Halyqulyn kóne kúıshilerdiń dástúrin jalǵastyrýshy dep ataýymnyń ózindik sebebi de bar. Qazirgi jas býyn kúıshiler bir kúıdi bári zaýyttan shyqqandaı etip bir mánermen oryndaıdy. Al burynǵy kóıshilerdiń árbiriniń óz máneri, tásili bolǵan. Dáýkeń sondaı óz shertý mánerin, qaǵys tásilin, dara sheberligin qalyptastyrǵan kúıshi edi. Kúı shertkende basqa kúıshilerde kezdespeıtin ózgeshe jańǵyryq dybystardy qosyp, kúıdiń bolmysyn baıytatyn. Men bala kúnimnen osy aǵalaryma eliktep, kúı ónerine yqylasym aýyp, dombyra shertýge áýestendim. Qazirgi kúnge deıin 50 jylǵa jýyq osy ónerdiń jalyna jarmasyp ómir súrip kelem. Ulttyq ónerge hal-qadirimshe adal bolyp, halyqqa, urpaqqa kúıimdi shertip nasıhattap júrmin. Kúı qorjynymda kóne kúıler kóp, eski sybyzǵy kúılerin de jańǵyrtyp dombyraǵa salyp shertemin. Bos ýaqytymda sheberhanamda dombyra, qobyz jasaýmen aınalysatyn taǵy bir ermegim bar. Sondyqtan ómirimniń máni de, sáni de dombyra bolyp júrip jatyrmyn! Al, osy atamyzdan, anamyzdan kele jatqan qasterleıtin dúnıemiz, asyl muramyz dombyranyń merekesi meniń óz merekemdeı úlken qýanyshqa bóleıdi! Ulttyq ónerimizdiń qadiriniń artýy, ulyqtalýy, toılanýy halyqtyń mereıin asyratyny shúbásiz. Kúı dástúri urpaqtan-urpaqqa amanattalyp órkendep, damı bersin! Besigimiz kúımen terbelsin!», - deıdi kúıshi Saırash Jarmuhametuly.