Qytaıdan kelgen 91 jastaǵy keıýana azamattyq aldy

NUR-SULTAN. QazAqparat - Kamal Qaharmanqyzy 1929 jyly qazirgi Almaty oblysy, Alakól aýdany, Jylandy aýylynda týǵan. El ishindegi aýmaly-tókpeli zamanda 1932 jyly 5 jasynda ata-anasymen Qytaı Halyq Respýblıkasyna qonys aýdarady, dep habarlaıdy QazAqparat «Otandastar qory baspasóz qyzmetine silteme jasap.

Ata-anasy Qytaı eliniń Buratala oblysy, Arasan aýdanynda aýyl-sharýshylyǵy salasynda eńbek etken. 1947 jyly Tegisbaı Ybyraıymulyna turmysqa shyǵady.

«Bala baýyr etiń» degendeı, 4 ul, 5 qyzynan 40 astam nemere-shóbere kórgen. Taǵdyr jazýymen atajurttan alys ketken keıýananyń armany elge oralý bolǵan. Qazaqstanǵa alǵash ret joldasy Tegisbaı Ybyraıymulymen 2004 jyly kelipti. 2006 jyly otaǵasy ómirden ótip, elge kelýine qıyndyq týady. Araǵa jyldar salyp otbasymen elge kóship keledi. Osy tusta Kamal áje qujat jasatý jaǵynan qıyndyqqa ushyraıdy. Sebebi elimizde shetelden kelgen azamattarǵa qujat jasatýdyń ózindik tártibi bar. Atap aıtsaq, týý týraly kýálik bolýy jáne pasportta tegi kórsetilýi kerek. Osy eki sebeppen biraz ýaqyt qujatyn jasata almaıdy. Osy oraıda «Otandastar qory» Kamal ájeniń máselesin qolǵa alyp, tıisti mekemelerdiń kómegimen azamattyq kýáligin alyp berdi. Ǵasyrǵa jýyq jasaǵan ájeniń olarǵa aıtar alǵysy sheksiz.