Qytaıdan Qazaq handyǵynyń tarıhyna qatysty 283 tom qujattar kóshirmesi jetkizildi

ASTANA. 11 qyrkúıek. QazAqparat - Bir top qazaqstandyq ǵalymdar Qytaıdan Qazaq handyǵynyń tarıhyna qatysty Tsın ımperııasynyń muraǵat qujattarynyń kóshirmelerin ákeldi. 283 tomdy quraıtyn biregeı muraǵat qujattarynyń basym bóligin negizinen Qazaq handyǵynyń kórshiles memlekettermen aradaǵy saýda-ekonomıkalyq baılanystary qurap otyr. Bul týraly búgin Astanada ótken baspasóz máslıhatynda QR Ulttyq ǵylym akademııasynyń akademıgi, tarıh ǵylymdarynyń doktory, professor Merýert Ábýseıitova málim etti.

Onyń aıtýynsha, 283 tomǵa jetken muraǵat qujattarynyń kóshirmesi negizinen 1730 jyldyń sońy men 1911 jyldyń ortasyna deıingi kezeńderdi qamtyp, qazaq-qytaı arasyndaǵy saıası, syrtqy saıası jáne ekonomıkalyq qarym-qatynastar sheńberin asha túsedi. «Mundaı biregeı baılanystardy bildiretin muraǵat qujattaryn muqııat zerdeleýge kirisip jatyrmyz. Eń bastysy qazirgi tańda da úlken mánge ıe mundaı hatqa túsken baılanystar arqyly biz dál sol ýaqytta oryn alǵan syrtqy baılanystar týraly naqty derekterge qanyǵatyn bolamyz. Bizdiń maqsatymyz Qazaq handyǵy tarıhyn osyndaı biregeı qujattar arqyly qalypqa keltirý bolyp tabylady», - deıdi M. Ábýseıitova. Onyń sózine qaraǵanda, muraǵattar arasynda 72 myńǵa tarta qujattar anyqtalǵan. «Osy qytaı muraǵatynda bizge áli de syry ashylmaǵan 3 myńnan astam qujattar bar, biz solarmen jumys isteýge tıispiz», - dedi ol.