Qytaıdan Fınlıandııaǵa qatynaıtyn júk poıyzy Qazaqstan arqyly júrip ótti

NUR-SULTAN. QazAqparat - Transkaspıı halyqaralyq kólik baǵdary arqyly Qytaıdan Fınlıandııaǵa jóneltilgen konteıner poıyzy Altynkól – Qorǵas temirjol shekara ótkeli arqyly júrip ótti, dep habarlaıdy QazAqparat.

Qurama júgi bar konteınerlik poıyz 48 qyryq fýttyq konteınerden turady.

Quram Qytaıdyń Týantszetsýn temirjol stantsııasynda (Chýntsın qalasy) quryldy.

Poıyz Qazaqstan, Ázerbaıjan, Grýzııa aýmaǵymen, odan ári Qara teńiz arqyly Rýmynııa baǵytymen Fınlıandııaǵa qaraı bet alady.

Fınlıandııanyń Koývola qalasyna deıingi 9 myń shaqyrymdyq kúrdeli mýltımodaldyq marshrýtty quram bar bolǵany 20 kúnde júrip ótedi.

Jóneltýdi «Nurminen Logistics Services OY» fın operatorymen «KTZ Express» AQ birlesip uıymdastyrdy.

Tasymaldaý qatysýshylary Transkaspıı baǵdarynda jańa servıs qurý Qazaqstan aýmaǵy arqyly tranzıtpen Qytaı – Fınlıandııa – Qytaı marshrýty boıynsha tasymal kólemin arttyratynyn atap ótti.

Esterińizge sala keteıik, buǵan deıin Fınlıandııadaǵy eń iri júk operatory Nurminen Logistics Qytaıdan Qazaqstan arqyly júretin konteınerlik baǵytty iske qosqanyn habarlaǵan bolatynbyz.

Eki el temirjol ákimshilikteri KTZ Express jáne Nurminen Logistics atynan yntymaqtastyq týraly memorandýmǵa qol qoıǵan.

Taraptar onyń aıasynda Qazaqstan arqyly Kaspıı boıynsha ekijaqty qatynastaǵy konteınerlik tasymaldy damytý týraly kelisken bolatyn.