Qytaıdan 250 keli kontrabandalyq ýyldyryq alyp ótpekshi bolǵandar ustaldy
11:03, 21 Jeltoqsan 2017
ASTANA. QazAqparat - Qazaqstan-Qytaı shekarasynda bir táýliktiń ishinde qara ýyldyryq pen teri buıymyn alyp ótpek bolǵandardyń joly kesildi, dep habarlaıdy «QazAqparat» HAA tilshisi QR UQK Shekara qyzmetine silteme jasap.
«Qorǵas» ótkizý beketiniń jasaǵy qara ýyldyryq alyp ótpek bolǵan 26 jastaǵy qazaqstandyqty ustady. Ony tekserý barysynda jalpy salmaǵy 250 keli bolatyn júk tabylǵan. Ustalǵan azamat Halyqaralyq shekara yntymaqtastyǵy ortalyǵynan Qazaqstanǵa bara jatqan.
Sol kúni 41 jastaǵy Qazaqstan azamatshasy teri buıymdaryn -túlki terisinen jasalǵan 6 ishikti alyp ótip bara jatyp ustaldy. Ol da Halyqaralyq shekara yntymaqtastyǵy ortalyǵynan Otanyna bet alǵan.
Barlyq fakti boıynsha ózara árekettesýshi organdardyń ókilderine habar berildi.