Qytaıdaǵy sý tasqyny saldarynan 15 adam qaza tapty

BEIJІŃ. QazAqparat – Qytaıdyń soltústigindegi Shansı provıntsııasynda nóser jaýynnan bolǵan sý tasqyny saldarynan kem degende 15 adam qaza taýyp, taǵy úsheýi iz-túzsiz joǵaldy. Bul týraly seısenbi kúni ótken brıfıng kezinde Shansı provıntsııasynyń bıligi málimdedi, dep habarlaıdy QazAqparattyń menshikti tilshisi.

Qytaıdyń soltústigindegi Shansı provıntsııasynda 2-7 qazan aralyǵynda jaýǵan nóser jaýyn saldarynan aýqymdy sý tasqyny júrip, 120 myńnan astam jergilikti turǵyndy evakýatsııalaýǵa týra kelgen. 1,7 mln astam adam joǵary qaýip aımaǵynda qalǵan. Aldyn ala esep boıynsha, 19,5 myń qurylys qıralyp, 18,2 myńnan astam turǵyn úı búlingen. Tikeleı ekonomıkalyq shyǵyn 5 mlrd astam ıýandi quraǵan.

Shansı provıntsııasynda normadan tys jaýǵan jańbyr saldarynan 37 ózenniń sýy tasyp, avtomobıl jáne temirjol qatynasy toqtap qalǵan.