Qytaıdaǵy koronavırýsqa baılanysty Atyraýdaǵy áýejaıda baqylaý kúsheıtildi

ATYRAÝ. QazAqparat – Qytaıda koronavırýstyń taralýyna baılanysty Atyraýdaǵy áýejaıǵa halyqaralyq reıspen keletinderge baqylaý kúsheıtildi, dep habarlaıdy QazAqparat tilshisi.

«Shetelden keletin barlyq jolaýshy arnaıy qurylǵymen – adamnyń temperatýrasyn anyqtaıtyn teplovızormen skanerlenedi. Qaýipsizdik sharalary Qytaıdaǵy oqıǵalarǵa baılanysty kúsheıtilip jatyr», - dedi oblystyq kóliktegi jumys pen qyzmet sapasyn baqylaý departamentiniń sanıtarly-karantındi baqylaý bóliminiń bas mamany Aınagúl Orynbasarova.

«Atyraý» halyqaralyq áýejaıynda apta saıyn segiz halyqaralyq reıs, atap aıtqanda Amsterdamnan tórt, Ystanbuldan eki, Frankfýrt-na-Maıneden eki reıs oryndalady. 2020 jyl bastalǵaly munda 32 halyqaralyq reıs oryndalyp, 2790 jolaýshy, sonymen birge 261 ekıpaj múshesi kelgen.

«Bizdiń mindet – bizdiń aımaqqa jańa koronavırýspen nemese basqa da ınfektsııamen aýyratyn adam keler bolsa – sony toqtatý. Qytaıdaǵy jaǵdaı ornyqqansha, jolaýshyldy barynsha tekseretin bolamyz», - deıdi ol.

Habarlanyp otyrǵandaı, temperatýrasy kóterilgen azamattar áli áýejaıda tirkelmepti. Búgingi kúni jaǵdaı turaqty.

Eske sala ketsek, búgin Ortalyq kommýnıkatsııalar ortalyǵynda ótken brıfıngte QR Densaýlyq saqtaý mınıstrligi Taýarlar men kórsetiletin qyzmetterdiń sapasy men qaýipsizdigin baqylaý komıteti tóraǵasynyń orynbasary Jandarbek Bekshın Qytaıda órship jatqan koronavırýs Qazaqstan aýmaǵynda tirkelmegenin málim etken edi.