Qytaıdaǵy qazaqstandyq dıplomattar alǵashqylardyń biri bolyp daýys berdi

BEIJІŃ. QazAqparat - Qytaıdaǵy QR Elshiligi janyndaǵy №257 saılaý ýchaskesinde Nur-Sultan ýaqytymen 05:00-da saılaý bastaldy, dep habarlaıdy QazAqparattyń Qytaıdaǵy menshikti tilshisi.

Qazaqstan Respýblıkasynyń Ánurany oryndalǵannan keıin birinshi bolyp dıplomatııalyq ókildiktiń basshysy Shahrat Nuryshev pen onyń áıeli daýys berdi.

Odan keıin Shanhaı yntymaqtastyq uıymyna bas hatshysynyń orynbasary Nurlan Aqqoshqarov pen jubaıy, dıplomattar men ulttyq kompanııa ókilderi daýys berdi.

Eske sala ketsek, búgin Qazaqstan Prezıdentin kezekten tys saılaý bastaldy.

QR Prezıdentiniń kezekten tys saılaýynda el ishinde jáne shet elderde 9 968 daýys berý ýchaskesi jumys isteıdi. Saılaý týraly Konstıtýtsııalyq zańǵa sáıkes, daýys berý ýaqyty standartty (saǵat 7.00-20.00 aralyǵy) bolady.

Batys Qazaqstan, Aqtóbe, Atyraý, Mańǵystaý, Qyzylorda oblystarynda ýaqyt aıyrmashylyǵyna baılanysty saılaý ýchaskeleri jergilikti ýaqyt boıynsha saǵat 07.00-de - Nur-Sultan ýaqyty boıynsha saǵat 08.00-de ashylady.