Qytaıdaǵy qazaq ádebıetiniń kórnekti ókili Zadaqan Myńbaı dúnıeden ótti

ASTANA. QazAqparat - Qytaıdaǵy qazaq ádebıetiniń kórnekti ókili, aqyn, sóz zergeri, qadirmendi aqsaqal Zadaqan Myńbaı 25 qańtarǵa qaraǵan túni týǵan jeri Tarbaǵataı aımaǵynyń Dórbiljin aýdanynda, 78 jasynda júrek aýrýynan qaıtys boldy.

Zadaqan Myńbaı 1939 jyly Qytaıdyń Shyńjań ólkesine qarasty Tarbaǵataı aımaǵy Dárbiljin aýdanynyń Qarakemel aýylynda dúnıege kelgen. Qytaı qazaqtary ádebıetiniń negizin qalaýshy iri tulǵalardyń biri.

1960 jyly Shyńjań ınstıtýtyn bitirgen. 1960-1980 jyldary Qytaıda júrgizilgen solshyl saıasat kesirinen jazyqsyz aıdaýda bolǵan. Aqtalǵannan keıin 1980-1997 jyldary aýdandyq sotta advokat qyzmetine kirisip, 1997 jyldan shyǵarmashylyq jumystarmen aınalysqan.

Qytaı jazýshylar qoǵamynyń, Qytaı az sandy ulttar qoǵamynyń múshesi, Shyńjań jazýshylar qoǵamynyń múshesi jáne jorasy, Іle Qazaq avtonomııaly oblystyq jazýshylar odaǵynyń múshesi jáne Avtonomııalyq ólke advokattar qoǵamynyń turaqty ókili.

Jas kezinde aqyn retinde ataqty kompozıtor Málik Júnisuly mýzykasyn jazyp taratqan, «Elektr» áni arqyly elge alǵash tanylǵan. 1960-1980 jyldary solaqaı saıasattyń kesirinen baspasózge jarııalaný quqyǵynan aırylǵan.

«Kókeıtesti» atty óleń-dastandar jınaǵy, «Mahabbat qurbandary» atty dastany (birlesken jınaq), «Betpe-bet» atty óleńder jınaǵy, «Dala zańy» atty dastandar jınaǵy baspadan shyqqan.

«Betpe-bet» Jańa dáýir ádebıeti úzdik shyǵarma syılyǵyna, «Dala zańy» Qytaı az ulttar ádebıeti úzdik shyǵarmasy syılyǵyna ıe bolǵan.

1984 jyly «Altyn qanat» balladasy Shyńjań uıǵyr avtonomııalyq ólkesiniń balalar ádebıeti syılyǵyn alǵan.

«Eı otynshy, qyrshyn taldy qımashy,

Jup torǵaıdy úrkitpeshi, qýmashy.

Jasty qısań qaıǵyryp jer qushady ,

Jupty qýsań eki aıyryl ushady», dep jyrlap, talaı qazaqtyń júregin ǵajap lırıkalarymen terbetken aqyn endi aramyzda joq...