Qytaıdaǵy qandastarymyz «Aqyldy qoıan» jańa elektrondy oqý quralyn satylymǵa shyǵardy
Atalmysh ıntellektýaldyq oqý quraly 3-12 jas aralyǵyndaǵy balalar men jasóspirimderge arnalǵan. Kólemi 800 shýmaqtan turatyn 88 túrli taqpaq, qazaq halyq ertegileri men shetel halyqtarynyń ertegilerin qamtyǵan 130 ertegi, qazaq halqynyń ádet-ǵuryp, ulttyq dúnıetanymyna qatysty 1500-ge jýyq ataýǵa túsinik berilgen. Sonymen qatar maqal-mátel, jańyltpash, yrymdar men tyıymdar, Abaı óleńderin qamtyǵan 500-ge jýyq mátin men 200-den astam ánder qamtylǵan.
«Buǵan deıin «Dana» qalamy arqyly oqytylatyn «Dybysty álippe», «Aǵylshyn tili negizderi», «Bastaýysh mektep oqýlyqtaryn oqytý quraly» syndy ónimder shyǵarǵan bolatynbyz. «Aqyldy qoıan» - osy materıaldardy balalarǵa oqyp beretin elektrondy qurylǵynyń aty. Qurylǵy túrli-tústi jaryq shyǵara alatyn, qulaqtary búkteýge yńǵaılastyrylǵan qoıan formasynda jasalǵandyqtan «Aqyldy qoıan» atalyp otyr. Bul oqý quralynyń sapasy joǵary, balalarǵa zalalsyz, baǵasy qoljetimdi. Ónimimizdi aldaǵy ýaqytta Qazaqstan naryǵyna shyǵarý máselesin de oılastyryp otyrmyz»,- deıdi «Meńtaı» JShS-nyń dırektory, joba avtory Qanatqan Ábilǵalıuly.
Ulttyq ekonomıka, ulttyq ónim jaıly sóz qozǵaǵanda Qytaıdaǵy baýyrlarymyzdyń alar orny bir tóbe. Búginde ulttyq naqyshtaǵy zamanaýı kıim-keshekter men turmystyq buıymdar, ulttyq áshekeıler, syrmaq, túskıiz syndy murajaılarda ǵana kezdeser qundy qolóner buıymdarymyz, qazaqy kilemder men ulttyq oıý-órnektegi qurylys materıaldary búginde Shyńjańnan shekara asyp, el aýmaǵyna da kelip jatyr.
Ata jurttan alysta jatsa da, ulttyń, «qara domalaqtardyń» qamyn oılap ter tógip júrgen asyl azamattarymyz ben ulttyq ónimderimizdiń sany kóp bolǵaı!