Qytaıdaǵy qandastar sol eldegi qytaılandyrý úderisine jutylyp ketpeýi kerek - B. Tileýhan

ASTANA. 11 qazan. QazAqparat /Qanat Mámetqazyuly/ - Qytaıdaǵy qandastar sol eldegi qytaılandyrý úderisine jutylyp ketpeýi kerek. Búgin QR Parlamenti Májilisinde «Nur Otan» HDP Fraktsııasy janyndaǵy Áleýmettik keńestiń otyrysy barysynda depýtat Bekbolat Tileýhan osylaı málim etti.

Esterińizge sala keteıik, jıyn «Memlekettiń oralmandarǵa qyzmet túrlerine qol jetkizýdi qamtamasyz etý salasyndaǵy áleýmettik saıasaty» taqyrybynda ótken bolatyn.

«1999 jyly qoldanysqa engen Adam quqyqtary jónindegi halyqaralyq paktilerdiń negizinde Qazaqstanda jáne Qytaıda bólinip-jarylǵan otbasylardyń týystary ózderiniń jeke kepildigimen quzyretti organnyń kelisimin alý arqyly kórshi eldegi otandastarymyzdy kóshirip ákelýshi edi. Sol tártip 2006 jyldan beri sap toqtap qaldy. Al halyqaralyq paktige sáıkes, shekaranyń eki betinde qalyp qalǵan týystar bir-birin eline shaqyrýǵa quqyǵy bar bolatyn. Osy halyqaralyq qujatty biz ózimizdiń zańymyz arqyly basyp tastappyz. Bul qalaı?», - deıdi óz sózinde B. Tileýhan. Bul rette depýtat qazirgi kúni Qytaıda 1,5 mln. qandas bar ekenin, al kórshi eldegi «batys Qytaıdy ıgerý» saıasatynan sol qandastardy qutqarmasa bolmaıtynyn alǵa tartady. «Óıtkeni, qytaı saıasatynyń búgingi jemisi - 13 jasqa deıingi qazaq balasy bara bara qazaqshadan qalyp, qytaıshaǵa kóship jatyr. Bir sózben aıtqanda, qytaılandyrý úderisi keremet qarqyn alyp barady. Sondyqtan da, búgin qımyldamasaq, erteń bári kesh bolýy múmkin», - dedi B. Tileýhan.