Qytaıdaǵy belgili dıktor Muratbek Tesebaev dúnıeden ozdy

NUR-SULTAN. QazAqparat – Qytaı qazaqtaryna belgili dıktor Muratbek Tesebaev 83 jasynda dúnıeden ozdy, dep habarlaıdy QazAqparat tilshisi.

Bul týraly onyń 25 jyl birge jumys istegen áriptesi aqyn, jýrnalıst, dıktor Serik Ábiluly habarlady.

Qazaqta dıktor jaıly sóz bolsa, Ánýarbek Baıjanbaevtyń aty qashanda birinshi bolyp eske túsetini belgili. Óıtkeni Ánýarbek Nyǵmetjanuly tańǵajaıyp daýysymen halqynyń sanasynda máńgilikke saqtalyp qaldy. Sol ataqty dıktordy ózine kásibı de, rýhanı da ustaz tutqan, daýysymen talaıdy tamsandyryp, aǵa jolyn qýǵan Muratbek Tesebaıuly da birtýar dara talant ıesi edi. Salıqaly eńbek jolynyń 58 jylyn radıoǵa arnaǵan, efırden tolyǵymen 50 roman oqyǵan ardager jýrnalıst, dıktor Muratbek Tesebaev - sheteldegi qazaq jýrnalıstıkasynyń damýyna eleýli eńbek sińirgen aıtýly tulǵa.

Muratbek Tesebaıuly 1939 jyly 15 jeltoqsanda Qytaıdyń Altaı aımaǵy Jemeneı aýdanynda dúnıege kelgen.

Aıta keteıik, 2015 jyly QHR-nyń Úrimji qalasyna QazAqparat tilshisi arnaıy baryp belgili dıktordan suhbat alǵan bolatyn.