Qytaıda jyl basynan beri alǵash ret bir táýlikte eshkim koronavırýs juqtyrmady

BEIJІŃ. QazAqparat – Qytaıda 2021 jyl bastalǵaly alǵash ret bir táýlikte bir de bir adam koronavırýs ınfektsııasyn juqtyrmaǵan. Bul týraly dúısenbi kúni QHR Gıgıena jáne densaýlyq saqtaý máseleleri boıynsha memlekettik komıteti málimdedi, dep habarlaıdy QazAqparat tilshisi.

Olardyń málimetinshe, Qytaıdyń medıtsına mekemelerinde áli vırýs juqtyrǵan 277 naýqas em alyp jatyr.

Jalpy shet elden kelgen, ınfektsııaǵa shaldyqqandar sany 4804-ke jetti, onyń 4527-i jazylyp shyqty.

Statıstıka boıynsha, QHR qurlyq bóliginde vırýs juqtyrǵandardyń 93,58% jazylǵan.

Infektsııaǵa shaldyqqandar sany – 89,7 myńnan asty, ólim kórsetkishi - 5,16% (4,6 myńnan asa adam qaıtys boldy).

Qazirgi kúni ınfektsııaǵa shaldyqqandarmen tyǵyz baılanysta bolǵan 27,6 myń turǵyn medıtsına qyzmetkerleriniń baqylaýynda.

Ótken táýlikte Qytaı bıligi esh belgisi joq 16 vırýs tasymaldaýshyny anyqtady, onyń 15-i shetelden kelgen.

Qytaı úkimeti sımptomsyz tasymaldaýshylardy jalpy statıstıkaǵa qospaıdy jáne bólek baǵanda kórsetedi.

Jalpy 639 sımptomsyz naýqasty medıtsına qyzmetkerleri baqylap otyr, onyń 291-i shetelden kelgen.

Eske sala ketsek, 2020 jyldyń jeltoqsanynyń ekinshi bóliginde Qytaıdyń ońtústik-batysyndaǵy Sychýan provıntsııasynda, sodan keıin Hebeı, Heılýntszıan, Tszılın jáne Qytaıdyń soltústik-shyǵysyndaǵy basqa da aımaqtarynda COVID-19 oshaqtary anyqtala bastady.

Jergilikti BAQ habarlaýynsha, qys kezinde elde jalpy 2071 jergilikti juqtyrý oqıǵalary tirkelgen.

Qytaı medıtsına sarapshylarynyń aıtýynsha, koronavırýs juqtyrý oqıǵalarynyń azaıýyna Qytaı aımaqtarynda qabyldanǵan qatań sanıtarııa-epıdemııalogııalyq sharalar jáne shetelden kelgen jáne taýar ımporttaıtyn adamdarǵa qatysty erejeler sebep boldy.