Qytaıda jappaı narazylyqtan keıin koronavırýs shekteýleri jeńildedi

ASTANA. QazAqparat – Ótken demalys kúnderi búkil el aýmaǵynda bolǵan kovıd shekteýlerine qarsy jappaı narazylyqtan keıin Qytaı bıligi «nóldik kovıd» saıasatyn birshama jeńildetýdi sheshti, dep habarlaıdy QazAqparat VVS-ge silteme jasap.

Shanhaı men Gýanchjoýdyń ondaǵan aýdanynda, aýrý juqtyrýshylar ósimi baıqalǵan qalalarda, sondaı-aq jappaı narazylyq bolǵan aımaqtarda beısenbide shekteý sharalary alynyp tastaldy.

Seısenbiniń basynda narazylyq tolqyny bastalǵan Úrimshi qalasynda shekteýler ishinara alynǵan edi.

El astanasy Beıjińde, Qytaıdyń eń iri qalasy Shanhaıda, sondaı-aq Nankın, Chendý, Ýhan jáne basqa da jerlerde sherý boldy.

Sherýge qatysýshylar urannyń ornyna qolyna bos aq qaǵaz ustap shyqty. Osylaısha olar tsenzýra tyıymdaryn aınalyp ótýge tyrysty.

Shekteýlerge jáne «nóldik kovıd» saıasatyna qarsy urandar arasynda QHR tóraǵasy Sı Tszınpınniń otstavkaǵa ketýin suraǵan óte erekshe saıası talaptar boldy.

Keıbireýler bul oqıǵany «aq qaǵazdar revolıýtsııasy» dep atady.

Buǵan deıin Qytaı basshylyǵy «nóldik kovıd» qatań saıasatyn ustandy. Bul kezde koronavırýs juqtyrý jaǵdaılarynyń kóp bolýyna baılanysty búkil mıllıondaǵan qalalar kenetten lokdaýnǵa jabylýy múmkin edi.

Shyńjań-Uıǵyr avtonomııalyq aýdanynyń ortalyǵy Úrimshi turǵyndarynyń aıtýynsha, dál osy saıasat ótken beısenbide kópqabatty úılerdiń birinde órt shyǵyp, adam ólimine sebep bolǵan.

Óıtkeni bul ǵımarattyń turǵyndaryna páterden shyǵýǵa tyıym salynǵan eken. Órt saldarynan 10 adam qaza tapty.

Sońǵy kúnderi Qytaıda pandemııa bastalǵannan beri koronavırýs juqtyrýdyń rekordtyq táýliktik kórsetkishi tirkeldi.

Sársenbide bir táýlikte 36 myńnan astam jaǵdaı anyqtalǵan.

Pandemııa bastalǵaly beri Qytaıda resmı málimet boıynsha 5200 adam qaıtys bolǵan.

Foto: www.bbc.com