Qytaıda týý kórsetkishi qatty túsip ketkendikten, túsik jasatýǵa ishinara tyıym salyndy

BEIJІŃ. SINЬHÝA-QazAqparat – Qytaı bıligi bosanýǵa deıingi jáne bosanǵannan keıingi qoldaýǵa arnalǵan birqatar sharalardy qamtıtyn, sondaı-aq halyq sanynyń teńgerimdi jáne uzaq merzimdi ósýine yqpal etýge baǵyttalǵan «Bala týýdy belsendi túrde qoldaý sharalaryn odan ári jetildirý jáne iske asyrý jónindegi nusqaýlyq» dep atalatyn qujatty jarııalady, dep habarlaıdy QazAqparat Sınhýa agenttigine silteme jasap.

Densaýlyq saqtaý isteri jónindegi memlekettik komıtet basqa 16 organmen birlesip jarııalaǵan osy qujatqa sáıkes, bul sharalarǵa ana men bala kútimi boıynsha qyzmetterdiń sapasyn jaqsartý, dekrettik demalys saıasatyn jaqsartý, turǵyn úı jáne salyq jeńildikteri, sondaı-aq jumys oryndarynda bala týýǵa qolaıly jaǵdaı jasaýǵa járdemdesý sharalary kiredi.

Sondaı-aq, Qytaıdyń ulttyq densaýlyq saqtaý komıssııasy túsik jasatýǵa ishinara tyıym salynǵanyn jarııa etti . Qytaı bıliginiń málimetinshe, 2015-2019 jyldar aralyǵynda elde jyl saıyn orta eseppen 9,5 mln túsik jasalǵan. Densaýlyq saqtaý salasy sheneýnikteriniń usynysy boıynsha, endi júktilikti tek medıtsınalyq sebeptermen ǵana toqtatýǵa bolady. Sondaı-aq, aldaǵy ýaqytta analarǵa áleýmettik kómek kórsetý aıasy keńeıip, bedeýlikti emdeýdi qoljetimdi bolmaq.

Qytaıda týý kórsetkishi bıyl buryn-sońdy bolmaǵan deńgeıge deıin tómendeıdi degen boljam bar: elde dúnıege keletin bala sany 10 mıllıonnan az bolýy múmkin (ótken jyly 10,6 mln bala týǵan, bul – aldyńǵy jylmen salystyrǵanda 11,5%-ǵa az).

Birikken Ulttar Uıymynyń boljamy boıynsha, 2023 jyly Úndistan Qytaıdy basyp ozyp, álemdegi halyq sany eń kóp elge aınalady.

Aıta ketsek, 1980-2015 jyldary Qytaıda «bir otbasy - bir bala» saıasaty júrgizildi. 2016 jyly otbasylarǵa 2 bala súıýge ruqsat berildi, al taǵy 5 jyldan keıin bala sany 3-ke jetti.

Foto: VCG