Qytaıda sý tasqynynan 500 myńnan astam adam zardap shekti

BEIJІŃ.QazAqparat – Qytaıdyń shyǵysyndaǵy Tszıansı provıntsııasynda nóser jaýynnan 500 myńnan astam adam zardap shekti. Tikeleı ekonomıkalyq shyǵyn 670 mıllıon ıýanǵa (97 mıllıon dollar) baǵalanady. Bul týraly Qytaı ortalyq telearnasy habarlady, dep habarlaıdy QazAqparat tilshisi.

Ótken aptadan beri Qytaıdyń ortalyq jáne shyǵys aımaqtarynda jaýǵan tolassyz jańbyr úlken sý tasqynyna ulasty, saldarynan bir Tszıansı provıntsııasynyń ózinde 536 myń adam zardap shegip, 16 myń turǵyn evakýatsııalandy.

Habarlamaǵa sáıkes, Tszıansı provıntsııasynda (Shyǵys Qytaı) sý tasqyny saldarynan júzden astam úı zardap shekti, 2,3 myń gektar aýmaqtaǵy egis alqaby joıyldy. Tikeleı ekonomıkalyq shyǵyn 670 mıllıon ıýanǵa (97 mıllıon dollar) baǵalandy.

Tolassyz jaýǵan jańbyrdan eldegi 21 ózende sý deńgeıi qaýipsiz deńgeıden asyp ketken.

Boljam boıynsha, mamyrdyń 11-i men 13-i aralyǵynda Qytaıdyń ońtústik aımaqtarynda, onyń ishinde Gýandýn, Haınan jáne Gýansı-Chjýan avtonomııalyq aýdanynda bir mezgilde nóser jaýyn jaýady.

Qytaı Halyq Respýblıkasynyń Sý tasqyny men qurǵaqshylyqqa qarsy kúres jónindegi memlekettik shtaby beısenbi kúni keshke sý tasqynyna qarsy tótenshe jaǵdaı rejıminiń engizilgenin habarlady.

Jergilikti bılik sý basýy múmkin aımaqtarda ornalasqan turǵyndardy evakýatsııalaý úshin aldyn alý sharalaryn júrgizýde.