Qytaıda sý tasqyny kezinde fermadan 75 qoltyraýyn qashyp ketti

ASTANA. QazAqparat – Ońtústik Qytaıda «Haıkýı» taıfýnynan bolǵan sý tasqyny kezinde janýarlar fermasynan ondaǵan qoltyraýyn shyǵyp ketti, dep habarlaıdy QazAqparat VVS agenttigine silteme jasap.

Maomın qalasyndaǵy (Gýandýn provıntsııasy) kól arnasynan tasyǵanda jaǵalaýdaǵy 75 qoltyraýyn syrtqa shyǵyp ketken.

Olardyń keıbiri tiri ustaldy, al basqalaryn jergilikti bılik «qaýipsizdik maqsatynda» atyp nemese elektr togymen óltirdi.

Memlekettik aqparat quraldarynyń málimetinshe, bılik qurǵan tuzaqtarǵa tek 8 qoltyraýyn túsken.

«Qashqyndardy» ustaýǵa qatysyp jatqan órt sóndirýshilerdiń biriniń aıtýynsha, aýlanǵan eresek qoltyraýynnyń ortasha salmaǵy shamamen 75 keli, uzyndyǵy 2 metrden asady.

Maomın qalasynda (Gýandýn provıntsııasy) birneshe qoltyraýyn fermasy ornalasqan. Olar teri úshin de, et úshin de ósiriledi.

Bılik fermaǵa jaqyn mańdaǵy kentterdiń turǵyndarynan qaýipsizdik maqsatynda úıden shyqpaýdy surady.

Aıta keteıik, Gonkong, Taıvan, Japonııa jáne Qytaıdyń bir bóligin aralap úlgergen «Haıkýı» taıfýny ońtústik Azııany bir aptadan astam ýaqyt dúrbeleńge salýda. Tabıǵı apat saldarynan jeti adam qaza taýyp, taǵy úsheýi iz-túzsiz joǵaldy, al Qytaıdyń ońtústiginde taıfýn laı kóshkini men sý tasqynyna ákep soqty.