Qytaıda sotty bolǵan Aqjarqyn Turlybaı úkim kúshine engen kezde Qazaqstanǵa ekstradıtsııalaý týraly ótinish bere alady - Bas prokýratýra
Bul týraly búgin Senattyń jalpy otyrysynan keıin jýrnalısterge bergen suhbatynda QR Bas prokýrorynyń orynbasary Jaqyp Asanov málimdedi.
«Qazaqstannyń azamatshasyna qatysty Qytaı sotynyń úkimi bizdiń bilýimizshe, áli kúshine ene qoıǵan joq, qorǵaýshylar joǵary ınstantsııaǵa shaǵymdanyp jatyr. Al ol úkim kúshine engen kezden bastap, Qazaqstan azamatshasy retinde ol bizdiń Bas prokýratýraǵa nemese qytaılyq tarapqa óziniń jazasyn óteý merzimin Qazaqstanǵa almastyrýdy suraı alady. Bul onyń zańdy quqyǵy, sonyń ishinde Qazaqstan men Qytaı arasynda sottalǵan tulǵalardy berý týraly kelisimshart 2011 jyly jasalǵan bolatyn», - dedi Jaqyp Asanov.
Onyń sózine qaraǵanda, Qytaıda sotty bolǵan Qazaqstan azamatshasyn ekstradıtsııalaý múmkindigi 1-2 jyldyń tóńireginde órbýi yqtımal. Degenmen, máseleniń bári Qytaı joǵary sot oryndarynyń shaǵym boıynsha isti qanshalyqty tezirek qaraýyna baılanysty bolyp turǵan kórinedi.
«Bizdiń Qylmystyq kodeks boıynsha da osyndaı qylmysy úshin qatań qylmystyq jaýapkershilik qarastyrylǵan. Eger isti qazaqstandyq sot qaraıtyn bolsa da, jaza jeńil bolmaıdy», - dedi Bas prokýror orynbasary jýrnalıster saýalyna jaýap bere otyryp.
Esterińizge sala keteıik, 20 jastaǵy qazaq qyzy Aqjarqyn Turlybaı 2014 jyldyń naýryz aıynda Qytaıdyń Malaızııamen shekarasynda esirtkimen ustalǵan bolatyn. Onyń júk sómkesinen 4,5 keli esirtki tabylyp, Aqjarqyn bul týraly bilmeıtinin málimdegen. Osy is boıynsha Qytaıdyń Gýanchjoý soty Aqjarqyn Turlybaıdy esirtki kontrabandasymen aıyptap, ómir boıyna bas bostandyǵynan aıyrdy.
Qazaqstan tarapy bolsa óz azamatshasyn ekstradıtsııalaýǵa bar kúshin salatyny da aıtylǵan edi.