Qytaıda monopolııa zańyn buzǵan iri IT kompanııalarǵa aıyppul salyndy

BEIJІŃ. QazAqparat – Qytaı bıligi eldiń iri IT korporatsııalaryna qatysty 43 isti qarastyryp jatyr. Olar monopolııaǵa qarsy zańnamany buzǵan. Bul týraly senbi kúni QHR naryqty retteý jónindegi memlekettik basqarmasy málim etti, dep habarlaıdy QazAqparattyń menshikti tilishisi.

Alibaba, Tencent, Baidu jáne t.b. sııaqty Qytaıdyń iri IT kompanııalary monopolııaǵa qarsy zańnamany buzǵan. Olar 500 myń ıýan (shamamen 78 myń dollar) kóleminde aıyppul tóleýi tıis.

QHR naryqty retteý jónindegi memlekettik basqarmasynyń málimdemesinde atalǵan isterdiń qaralýy «naryq qatysýshylary arasyndaǵy ádil básekelestikti qamtamasyz etedi, ony ári qaraı jetildire túsedi, sonymen qatar kásiporyndar men salalardyń turaqty jáne ádil damýyna yqpaldasady» delingen.

Eske sala keteıik, 18 qarasha kúni Beıjińde QHR memlekettik monopolııaǵa qarsy basqarmasynyń qurylyp, jumysyn bastaǵany týraly habarlandy.

Avtory Rýslan Súleımenov