Qytaıda meıramhanada bolǵan jarylystan 31 adam qaza tapty
10:10, 22 Maýsym 2023
INЬChÝANЬ. SINЬHÝA-QazAqparat - Qytaıdyń soltústik-batysyndaǵy Nınsıa-Hýeı avtonomııalyq aýdanynyń Inchýan qalasynda ornalasqan barbekıý meıramhanasynda jarylys bolyp, 31 adam qaza tapty. Bul týraly QazAqparat Sınhýa aqparat agenttigine silteme jasap habarlaıdy.
Jarylys jergilikti ýaqyt boıynsha shamamen saǵat 20:40-ta, Inchýan qalasyndaǵy Sıntsın aýdanynda ornalasqan meıramhanada boldy. Oǵan suıytylǵan munaı gazynyń aǵýy sebep bolǵany habarlanady.
Nınsıa-hýeı avtonomııalyq aýdanynyń QKP komıtetiniń málimetinshe, jarylystan 38 adam zardap shekken, onyń 31-i kóz jumdy. Qalǵan 7 adamǵa medıtsınalyq kómek kórsetilip jatyr, olardyń bireýiniń jaǵdaıy aýyr.