Qytaıda mereke kúnderinde týrıster aǵyny artty

BEIJІŃ. QazAqparat - Búkilhalyqtyq merekelerde (29 sáýir – 3 mamyr) Qytaıdaǵy týrıster aǵyny ótken jyldyń osy kezeńimen salystyrǵanda 70,8%-ǵa artyp, olar 274 mln sapar jasady. Bul týraly QHR Mádenıet jáne týrızm mınıstrliginiń habarlamasynda aıtylǵan, dep habarlaıdy QazAqparat tilshisi.

Vedomstvonyń málimetinshe, birinshi mamyrda Qytaıda 274 mıllıon sapar jasaldy, bul 2022 jyldyń sáıkes kezeńimen salystyrǵanda 70,8%-ǵa kóp. Saıahat kezinde týrıster 148 mıllıard ıýan (aǵymdaǵy baǵam boıynsha shamamen 21 mıllıard dollar) jumsady, bul ótken jylmen salystyrǵanda 128,9%-ǵa ósti jáne 2019 jylǵy kórsetkishpen teńesti.

Eń iri megapolıs Shanhaıǵa mamyr aıynyń birinshi demalysynda 15,6 mıllıonnan astam adam keldi. Qalanyń týrızmnen túsken kirisi bes kún ishinde 18,9 mıllıard ıýandy (shamamen 2,7 mıllıard dollar) qurady. Shanhaıdyń basty kórikti jerleri 6,4 mıllıon týrıstti tartty. Megapolıstegi qonaqúılerdiń ortasha tolymdylyǵy 70%-dan asty.

Mamyr aıyndaǵy merekelerde Haınan kýrorttyq aralyna týrıster aǵyny 3,2 mıllıon adamnan asty (+141,5%). Bes kún ishinde Haınannyń ishki týrızmnen túsken kirisi 4,23 mıllıard ıýandy (612 mıllıon dollar) qurady.