Qytaıda koronavırýsqa qarsy shekteý sharalary jeńildeýde

BEIJІŃ. QazAqparat – Beıjiń men Úrimshi bıligi osy aptada koronavırýs profılaktıkasy boıynsha sharalardy ońtaılandyrdy, dep habarlaıdy QazAqparat menshikti tilshisi «Sınhýa» agenttigine silteme jasap.

Beıjiń aýrýlardyń aldyn alý jáne baqylaý ortalyǵynan atap ótkendeı, COVID-19 ınfektsııasynyń sany ósýi aıasynda epıdemııamen kúresý sharalaryn ońtaılandyrý qajet. Beıjińniń epıdemıologııalyq qaýpi joǵary aımaqtarynda ornalasqan turǵyn úı keshenderiniń qaqpalary men kireberisterin buǵattaýǵa tyıym salynady.

Medıtsınalyq tasymaldaý, shuǵyl evakýatsııalaý jáne shuǵyl kómek kórsetý úshin jol bos bolýy kerek. Buǵan deıin Qytaı astanasynyń bıligi azyq-túlik pen qajetti taýarlardy satatyn saýda ortalyqtary men sýpermarketterdiń jumysyn jandandyrýdy jedeldetetinin habarlady. Mundaı saýda núktelerine COVID-19 jaǵdaılary anyqtalǵan kezde ǵımarat jabylǵannan keıin jáne dezınfektsııalanǵannan keıin jumysty qaıta bastaýǵa ruqsat etiledi. Ótken táýlikte Beıjińde koronavırýs juqtyrýdyń 4,3 myńnan astam jańa jaǵdaıy anyqtaldy. QHR Shyńjań-Uıǵyr avtonomııalyq ólkesiniń (ShUAÓ) ákimshilik ortalyǵy – Úrimshi qalasynda qoǵamdyq kólik jáne jetkizý qyzmetteriniń jumysy qalpyna keltirildi. Epıdemıologııalyq qaýip deńgeıi tómen qalalyq aýdandarda kásiporyndar, sýpermarketter, dárihanalar men tamaqtaný oryndary jumysyn jalǵastyrýda. Úrimshi mýnıtsıpaldyq bıligi seısenbi kúni brıfıng barysynda muqtaj turǵyndarǵa koronavırýs epıdemııasynyń saldaryn jeńýge kómek kórsetýge baǵyttalǵan sharalar ázirlengenin málimdedi. Tabysy tómen nemese tabysy joq qala turǵyndary úshin sýbsıdııalar beriledi. Memlekettik turǵyn úı baǵdarlamalary boıynsha turǵyn úıdi jalǵa alatyn otbasylar bes aıǵa jaldaý aqysynan bosatylady. Úrimshide turatyn jáne jumys izdeýde qıyndyqtarǵa tap bolǵan az qamtylǵan turǵyndar úshin qala bıligi jumys oryndaryn usynady. QHR Densaýlyq saqtaý isteri jónindegi memlekettik komıtetiniń málimetinshe, ótken táýlikte qurlyqtyq Qytaıda aýrý juqtyrýdyń 38 myńnan astam jańa jaǵdaıy anyqtaldy.

Buǵan deıin habarlaǵanymyzdaı, Qytaıda bir táýlikte korrnavırýs juqtyrǵandar sany 40 myńnan asqan bolatyn. Sońǵy alty aı ishinde Qytaıda alǵash ret koronavırýstan bolǵan úsh ólim jaǵdaıy tirkelgen edi.

Foto: Su Yang/ EFE