Qytaıda qazaqstandyq stýdentterdiń ІІ Quryltaıy ótýde

ASTANA. 24 sáýir. QazAqparat - 23 sáýir kúni Shanhaı qalasynda QR Prezıdentiniń «Bolashaq» halyqaralyq stıpendııasynyń 20 jyldyǵyn merekeleý sheńberinde Qytaıdaǵy qazaqstandyq stýdentterdiń ekinshi quryltaıy bastaldy.

26 sáýirge deıin jalǵasatyn is-sharany uıymdastyrýshylar QR Bilim jáne ǵylym mınıstrligi, «Halyqaralyq baǵdarlamalar ortalyǵy» AQ (HBO) jáne «Bolashak students in China» stýdenttik uıymy.

Oǵan QHR-daǵy QR elshiliginiń, «HBO» AQ, «Bolashaq» qaýymdastyǵy, «Qazaqfılm» AQ basshylary, Shanhaıdaǵy Bas konsýl, sondaı-aq AQSh pen Qytaıdaǵy, Eýropa, Azııa jáne TMD elderindegi kóptegen qazaqstandyq stýdentter uıymdarynyń ókilderi qatysýda.

Іs-shara sheńberinde QHR aýmaǵynda jumys isteıtin qazaqstandyq stýdenttik uıymdaryn biriktirý memorandýmyn jasaý jáne QR Prezıdentiniń «Bolashaq» halyqaralyq stıpendııasynyń 20 jyldyǵyna oraı resmı qabyldaýlar kútilýde.

Quryltaı baǵdarlamasy kúrdeli ekendigin atap ótken jón. Ony ótkizý barysynda Fýdan ýnıversıteti Halyqaralyq bilim ınstıtýtynyń, «Tszıaotýn» Shanhaı ýnıversıteti (Shanghai Jiaotong University) Halyqaralyq bilim ınstıtýtynyń, Shanhaı qarjy-ekonomıkalyq ýnıversıteti Halyqaralyq almasý ınstıtýtynyń basshylarymen kezdesýler ótkiziledi.

Іs-shara sheńberinde QR Prezıdentiniń «Bolashaq» halyqaralyq stıpendııasy tanystyrylatyn 9-shy Halyqaralyq bilim forýmy men halyqaralyq bilim kórmesiniń barysynda yntymaqtastyqty keńeıtý máseleleri talqylanatyn bolady.

Sonymen qatar Quryltaı qatysýshylary qazaqstandyq rejısserdiń bolashaqtyqtar týraly «Bolashaq úshin» fılmin kórý múmkindigine ıe bolady jáne olar komandalyq rýhty biriktirý úshin ótkiziletin flesh-mobqa qatysyp, qalanyń kórikti jerlerimen tanysady.